काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (सोमबार) पहिलो राउन्डको अन्तिम दुई खेलमा प्रतिस्पर्धा हुँदैछ । दुवै खेल त्रिपुरेश्वरस्थित दशरथ रंगशालामा नै हुनेछ ।

पहिलो खेलमा विभागीय डर्वीमा त्रिभुवन आर्मी फुटबल क्लब र नेपाल पुलिस क्लबबीच प्रतिस्पर्धा हुनेछ । खेल दिउँसो १ बजेपछि हुनेछ । उपाधि दावेदार दुवै टोली जित निकाल्दै लिगमा सुखद् सुरुआत गर्ने योजनामा मैदान उत्रनेछन् ।

गत सिजन दोस्रो स्थानमा चित्त बुझाएको आर्मी यसपाली च्याम्पियन बन्ने लक्ष्यमा रहँदा पुलिसलाई हराउँदै सुखद सुरुवात गर्ने लक्ष्यमा मैदानमा उत्रनेछ ।

भरत खवासको कप्तानीमा उत्रने आर्मीसँग जर्ज प्रिन्स कार्की, गौतम श्रेष्ठ, सुमन अर्याल, विकेश कुथु, सन्तोष तामाङ, सेसेहाङ आङ्देम्वे, दिनेश हेन्जन र विकास तामाङ लगायतको खेलाडीको साथ रहेको छ । चोटका कारण फरवार्ड नवयुग श्रेष्ठ र डिफेन्डर विकास खवास टोलीमा हुनेछैनन् ।

यता, चार पटकको लिग च्याम्पियन पुलिस पनि आर्मीलाई हराउँदै लिगमा सुखद् सुरुआत गर्ने लक्ष्यमा हुनेछ । टोलीसँग जुमानु राई, भरत शाह, हेम तामाङ, नीरकुमार राई, सुमन लामा, तेज तामाङ, अजित भण्डारी, रवि पासवान, रविन श्रेष्ठ, सन्तोष हेमरुन, अञ्जन राई, बुद्ध बल तामाङ, रोशन खड्का र तीर्थबहादुर बस्नेतको साथ रहेको छ ।

गत सिजनको लिगमा आर्मीले ४–२ को जित निकालेको थियो । आर्मी सोही जितलाई निरन्तरता दिने लक्ष्यमा रहँदा पुलिस उक्त हारको बदला लिने योजनामा हुनेछ ।

दिनको दोस्रो खेलमा अघिल्लो सिजनको लिग च्याम्पियन मच्छिन्द्र फुटबल क्लबले न्युरोड टिम (एनआरटी) को सामना गर्दैछ । खेल दिउँसो ४ः४५ बजेपछि हुनेछ । मच्छिन्द्र एनआरटीलाई हराउँदै उपाधि रक्षा अभियान थाल्ने छ भने एनआरटी मच्छिन्द्रलाई स्तब्ध पार्दै लिगमा सुखद् सुरुआतको योजनामा हुनेछ ।