काठमाडौं (हाम्रो खेलकुद)– सातदोबाटो युथ क्लबका प्रशिक्षक मेघराज केसीले लिगलाई म्याराथन दौडसँग तुलाना गर्दै एक दुई किलोमिटरमै हिसाबकिताब गर्न हतार हुने बताएका छन् ।

कतार एयरवेज सहिद स्मारक ए डिभिजिन लिगमा शुक्रबार आफ्नो पूर्व क्लब थ्री स्टार क्लबलाई १–० ले पराजित गरेपछि प्रशिक्षक केसीले भने,‘ म्याराथन दौडमा ४० किलोमिटर कटेपछि कहाँ छौं हामी भन्ने हुन्छ । अहिले टेबल तिर हेर्ने बेला भएको छैन ।

दुई खेलमा अपराजित केसीको टोलीले ४ अंक जोडेको छ । पहिलो खेलमा सातोदाबाटोले फ्रेन्ड्स क्लबसँग गोलरहित बराबरी खेलेको थियो । केसीले टोलीको प्रदर्शनबाट आफू सन्तुष्ट रहेको बताएका छन् । उनले भने ‘ नयाँ टिमले थ्रीस्टार जस्तो टिमसँग निकै राम्रो मेहनत गरेर खेलेको हो । जितेर मात्र राम्रो भनेको होइन कि मौकाकै हिसाब गर्यो भने पनि उनीहरुले एउटा बल लङ डिस्ट्यान्टबाट हाने भने हामीले टेन यार्डबाट कम्तीमा पनि छ सात वटा बल हान्यौं ।’

उनले टोलीको प्रदर्शनमा अझै सुधारको आवश्यकता रहेको औल्याए । ‘ केटाहरुको स्कोरिङ चाहि अझै सुधार गर्न बाँकी छ । समग्रमा सन्तुष्ट छु , उनले थपे,‘ नयाँ केटाहरुले यत्तिको खेलिराको छ । यो टिमबाट अझै आश गरेको छु । अझै हामीले मेहनत गर्न बाँकी छ ।’

उनले आफ्नो कुनै पनि क्लबलाई पूर्व क्लब वा अन्य भनेर नहेर्ने पनि बताए । ‘सबै १३ टोलीलाई प्रद्विन्द्विका रुपमा लिएको छु । प्रत्येक टिमसँग जित्नुपर्छ । जित्नका लागि कोचले पनि धेरै मेहनत गर्नुपर्छ खेलाडीले पनि मेहनत गर्नुपर्छ । त्यति एउटा सामान्य सोच राखेको छु, केसीले अगाडि भने, एक वर्षमै क्लबहरुमा धेरै पविर्तन हुन्छ । सिजन चेन्ज फेरि सुरुबाट टिम बनाउनुपर्छ । हामीमा नै अझै कमी कमजोरी छ । यत्तिको मिस्टेक खेलेर सधै राम्रो हुँदैन ।’

सातदोबाटोसँग स्तब्ध भएपछि उपाधि यात्रा कठीन हुन सक्ने थ्री स्टारका प्रशिक्षक उज्जन श्रेष्ठले बताए । पहिलो खेलमा च्यासलमाथि ३–० को शानदार जित दर्ता गरको थ्री स्टार दोस्रो खेलमै पराजित भएको छ । सातदोबाटोका सुदीप गुरुङले पहिलो हाफमा गरेको गोल नै थ्री स्टारको हारका लागि पर्याप्त रह्यो ।

‘हामीले स्वभाविक खेल्न सकेनौं । मिडिल्डर हेमन्त थापामगर अस्वस्थ भएका कारणले पहिलो रोजाईमा थिएनन, श्रेष्ठले भने, उनको अनुपस्थितिले हामीलाई गाह्रो भयो । अन्त्यतिर उनलाई उतारेपनि फर्कन सकेनौं । सातदोबाटोले उत्कृष्ट खेल्यौ ।