काठमाडौं (हाम्रो खेलकुद) – प्रशिक्षणमा सेट पिसमा गरेको अभ्यास सफल भएर विजयी गोल निक्लेपछि थप खुसी लागेको मनाङ मर्स्याङ्दी क्लबका प्रशिक्षक राजेन्द्र तामाङले बताए ।

मनाङले कतार एअरवेज सहिद स्मारक ए डिभिजन लिगमा शनिबार दोस्रो जित निकालेको थियो । दोस्रो हाफमा पुजन उपरकोटीको कर्नरमा निशान लिम्बुले ६ यार्ड बक्सनजिक फ्लिक हेडरमार्फत मिलाइदिएको पासलाई अनमार्क ओलावालेले गोल गरेका थिए । उक्त गोलको सहयतामा मनाङले १–० को जित निकालेको थियो । पहिलो खेलमा पनि सेट पिसमा नै दीनेश राजवंशीले गोल गर्दा मनाङले जावलाखेल युथ क्लबलाई १–० ले पराजित गरेको थियो ।

हिमालयन शेर्पा क्लबले बराबरीको लक्ष्यका साथ खेलेको जनाउँदै तामाङले भने, ‘उनीहरुले डिप बसेर खेलेका थिए । त्यसमा गोल गर्न गाह्रो हुन्छ । हामीले बढी भन्दा बढी विङ्गबाट क्रस गर्ने योजना बनाएका थियो । पहिलो हाफमा धेरै मौका पनि पाएनौं । क्रससँगै हामीले सेट पिसेमा पनि ध्यान दिइरहेका छौं । त्यसले सफलता पनि दिलायो । आज प्रशिक्षणमा गरेको प्रयास खेलमा गोल निस्कियो । अझ विजयी गोल समेत भएपछि खुसी त हुने नै भयो ।’

त्यसो त मनाङको आक्रमणमा नाइजेरियन फरवार्डद्वय ओलावाले अफिज र आदेलाजा सोमिदेसँगै राष्ट्रिय टोलीका फरवार्ड अन्जन विष्ट छन् । नेपाली फुटबलमा लामो समयदेखि खेल्दै आएका नाइजेरियन जोडीको प्रदर्शन राम्रो हुन सकेको छैन । दुवै खेलमा मनाङका विदेशी खेलाडीले खासै प्रभाव जमाउन सकेका छैनन् । प्रशिक्षक तामाङले यसबारे आफु सचेत रहेको बताए ।

‘हामीले यसबारे ध्यान दिएका छौं । हामीले आफिज र सोमिदे कुन स्तरका खेलाडी हुन् भन्ने देखेका छौं । उनीहरुबाट पक्कैपनि सोचेजस्तो प्रदर्शन हुन सकेको छैन । व्यवस्थापनले पनि योबारे ध्यान राखेको छ । मैले पनि आज दुवै नचलेपछि एकजनालाई बाहिर निकालेको हुँ । नेपाली फुटबलमा लामो समय खेलेपछि यहाँको शैली बुझेर पनि त्यसो भएको हुनुपर्छ,’ उनले भने ।

दोस्रो खेलमा हार बेहोरेपछि हिमालयन शेर्पाका प्रशिक्षक युगलकिशोर राईले खेलाडीले एकदम मिहिनेत गर्दै खेललाई नियन्त्रणमा राखेको जनाउँदै भने, ‘नतिजा ल्याउन सकेनौं । सेट पिसमा गोल खान पुग्यौं । यसो भनिरहँदा म आफ्नो सिद्धान्तबाट पछि भने हट्दिन । हाम्रो प्रदर्शन योजना अनुसार नै भएको छ । मात्र गोल हुन सकेको छैन । र त्यसमा भाग्यको पनि साथ चाहिने रहेछ,’ उनले भने ।

शेर्पाले केन्याका पिस्तोने मुताम्बालाई एकल फरवार्डको रुपमा खेलाइरहेको छ । तर उनले अपेक्षित प्रदर्शन गर्न नसक्दा राईले भने, ‘हाम्रो फरवार्डले अलि सोचे जस्तो खेल्न सकिरहेका छैनन् । एकल फरवार्ड भएपनि हाम्रो सिस्टम छ । त्यसमा उनले खेल्नुपर्ने हो । आउने दिनमा राम्रो प्रदर्शन हुने आशा छ । हामी आफ्नो शैली परिवर्तनबारे भने सोचेका छैनौं । यो निरन्तर प्रक्रिया हो र केहि समय लाग्छ भन्ने थाहा छ ।’