काठमाडौं (हाम्रो खेलकुद)– न्युरोड टिम (एनआरटी) ले कतार एअरवेज सहिद स्मारक ‘ए’ डिभिजन लिगमा पहिलो अंक जोडेको छ । ब्रिगेड ब्वाइज क्लब (बिबिसी) सँग गोलरहित बराबरी खेल्दै एनआरटीले दोस्रो खेलबाट पहिलो अंक जोडेको हो ।

त्रिपुरेश्वरस्थित दशरथ रंगशालामा सोमबार भएको निराशजनक खेलमा दुवै टोलीले गोलको उल्लेख्य आक्रमण बुन्न सकेनन् । ५०औं मिनेटमा दिनेश राईको प्रहार आकासिदा बिबिसीले अग्रता लिनबाट चुक्यो । ६०औं मिनेटमा सुजन गुरुङको पेनाल्टी बक्सबाहिरको प्रहार सदुयोग हुन सकेन । ६१औं मिनेटमा मेसुके ओलुमोउको क्रस सदुपयोग हुन सकेन ।

६५औं मिनेटमा दिनेशको पेनाल्टी बक्सभित्रको प्रहार गोलरक्षक अजित प्रजापतिले पञ्च गर्दै बचाए । ८५औं मिनेटमा ड्याडी जुनियर वाम्वाको हेडर सदुपयोग हुन सकेन । इन्ज्युरी समयको थप गरिएको दोस्रो मिनेटमा रुडीको प्रहारलाई एनआरटीका गोलरक्षक अजितले पञ्च गर्दै बचाए ।

बराबरीपछि एनआरटीको दुई खेलबाट १ अंक पुगेको छ । अपराजित बिबिसीको दुई खेलबाट ४ अंक छ । बिबिसीले पहिलो खेलमा नेपाल एपीएफ फुटबल क्लबलाई ३–२ ले पराजित गर्दै विजयी सुरुवात गरेको थियो । एनआरटीले पहिलो खेलमा साविक विजेता मछिन्द्रसँग २–१ को हार बेहोरेको थियो ।

लिगमा आजै दोस्रो राउन्डको अन्तिम खेलमा साविकको विजेता मच्छिन्द्र फुटबल क्लब र त्रिभुवन आर्मी फुटबल क्लबबीच दिउँसो ४ः४५ बजे हुनेछ । मच्छिन्द्र लगातार दोस्रो जितको खोजीमा रहँदा आर्मी पहिलो जितको लक्ष्यमा हुनेछ । मच्छिन्द्रले पहिलो खेलमा एनआरटीलाई २–१ ले पराजित गर्दा आर्मीले विभागीय डर्वीमा पुलिससँग १–१ गोलको बराबरी खेलेको थियो ।