काठमाडौं (हाम्रो खेलकुद)– अघिल्लो संस्करणको कतार एअरवेज सहिद स्मारक ए डिभिजन लिगको विजेता साविक विजेता मछिन्द्र फुटबल क्लब र त्रिभुवन आर्मी फुटबल क्लबले यसपटक सोमबार गोलरहित बराबरी खेल्दा दुवै टोलीका प्रशिक्षकले फरवार्ड लाइनमा समस्या रहेको बताए ।

२०७६ फागुन ३ गते लिगको अन्तिम खेलमा आर्मीलाई हराउँदै पहिलो पटक लिग मछिन्द्रलाई लिग च्याम्पियन बनाएका प्रशिक्षक प्रवेश कटुवालले सोमबारको बराबरीपछि भने, ‘हामीले सोचे अनुरुपको प्रदर्शन गर्न सकेनौं । आर्मी सेट टोली हो । उनीहरुले राम्रो खेले । हाम्रोमा प्रोपर फरवार्डको कमी प्रष्ट देखियो । विमल घर्तीमगर पूर्ण रुपमा फिट छैनन् । हाम्रो सेन्टर फरवार्ड रेजिन सुब्बा चोटका कारण अझै एक महिना खेल्न सक्ने अवस्थामा छैनन् ।’

टोलीका अर्का फरवार्ड अभिषेक रिजालले पनि सोचे अनुरुपको प्रदर्शन गर्न नसकेको कटुवाको भनाई थियो । ‘अभिषेकले प्रशिक्षणमा राम्रो गर्दै आएका छन् । त्यसले हामीले उनलाई मौका दिएका हौं’, उनले भने, ‘तर पछिल्ला दुई खेलमा उनले अपेक्षा अनुसार खेल्न सकेका छैनन् ।’

उता आर्मीका प्रशिक्षक नवीन न्यौपानेले पनि फरवार्ड लाइनमा समस्या रहेको बताए । ‘नवयुग श्रेष्ठको अभाव खड्कियो । हामीले रक्षापंक्तिमा एकदम राम्रो खेल्यौं’, उनले भने, ‘तर मिडफिल्ड र फरवार्ड लाइनमा राम्रो गर्न सकेनौं । ७० मिनेटपछि केहि खेलाडी परिवर्तन गरेपछि भने हामीले खेलमा पकड जमायौं । तर स्कोर भने भएन । ठूलो टोलीहरु संग अंक लिन नसक्दा उपाधि जित्ने लक्ष्यमा धक्का पुग्छ नै । चोटग्रत नवयुगको गत महिना घुँडाको शल्यक्रिया गरिएको थियो । उनले यसपटकको लिग पूरै गुमाउने सम्भावना छ ।’

राष्ट्रिय टोलीका पूर्व मिडफिल्डर जगजित श्रेष्ठलाई पनि आर्मीले भित्राएको छ । तर, उनी अझै टोलीमा घुलमिल हुन बाँकी रहेको प्रशिक्षक न्यौपानेले बताए । ‘अष्ट्रेलियाबाट लिग खेल्दै स्वदेश फर्केका जगजितले उत्कृष्ट खेलाडी भएपनि आर्मीको इन्टेन्समा भिज्न केहि समय लाग्न सक्ने बताए । उ एकदम राम्रो खेलाडी हो । तर आर्मीको आफ्नै शैली छ । त्यसमा अभ्यस्त हुन सायद केहि समय लाग्छ होला,’ उनले थपे ।

विभैया टोली आर्मी र एपिएफले क्लब लाइसेन्स प्राप्त गरेपछि विदेशी खेलाडी अनुबन्ध गर्ने चर्चा पनि चलेको छ । न्यौपानेले क्लब लाइसेन्स प्राप्त पछि विदेशी खेलाडीका लागि क्लबमा भित्राउन बाटो खुले पनि त्यहि सहज भने नभएको बताए । ‘यो माथिबाट पहल गर्नुपर्ने हुन्छ । तर अहिले हामीसँग जति खेलाडी छन् । त्यसको आधारमा विदेशी नहुँदा पनि फरक पर्दैन’, उनले थपे, ‘तर पछि क्लबको अन्तर्राष्ट्रिय प्रतियोगिता खेल्नपर्दा भने विदेशी खेलाडी आवश्यक पर्न सक्छ ।’

आर्मीले २ खेलमा दोस्रो बराबरी गर्दै २ अंक जोडेको छ । मछिन्द्रले भने २ खेलमा ४ अंक जोडेको छ । लिगको शीर्षस्थानमा २ खेलमा ६ अंक जोडेको मनाङ मर्स्याङ्दी रहेको छ । मनाङले पहिलो चरणमा जावलाखेललाई तथा दोस्रो चरणमा नेपाल आइस हिमालयन शेर्पालाई समान १-० ले पराजित गरेको थियो ।