काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगअन्तर्गत चौथो चरणका अन्तिम दुई खेल आज हुँदैछन् । दशरथ रंगशालामा दिउँसो १ः०० बजे सुरु हुने खेल नेपाल पुलिस क्लब र संकटा क्लबबीच हुनेछ । दिउँसो ४ः४५ बजे ललितपुरका दुई टोली ब्रिगेड ब्वाइज क्लब (बिबिसी) र जावलाखेल युथ क्लबबीच प्रतिस्पर्धा हुनेछ ।

समान ५ अंकका साथ छैटौं स्थानमा रहेको संकटा र सातौं स्थानको पुलिसले दोस्रो जितका लागि प्रयास गर्नेछन् । दुवै टोली जित निकाल्दै अंक तालिकाको तेस्रो स्थानमा उक्लने प्रयासमा हुनेछन् । ३ खेल सम्म दुवै टोली अपराजित छन् । संकटा र पुलिसले ३ खेलमा १ जित र २ बराबरी खेलेका थिए ।

शीर्षस्थानको साविक विजेता मच्छिन्द्र र मनाङ मस्याङ्दी क्लबको समान १० अंक छ । तेस्रो स्थानको त्रिभुवन आर्मी फुटबल क्लबको ८, सातदोबाटो युथ क्लबको ७ अंक छ ।

अर्को खेलमा जावलाखेल पहिलो अंकको प्रयासमा बिबिसीविरुद्ध उत्रनेछ । ३ खेलमा जावलाखेलले अंकको मात्र होइन गोलको पनि खाता खोल्न सकेको छैन । ३ खेलमा टोलीले गोल खाइसकेको छ । बिबिसीले भने ३ खेलमा १ जित, १ बराबर र १ हारका साथ ४ अंक जोड्दै नवौं स्थानमा रहेको छ ।
लिगमा आइतबार थ्री स्टार क्लबसँग गोलरहित बराबरी गर्दै एपिएफ फुटबल क्लबले पहिलो अंक जोडेको थियो ।