काठमाडौं (हाम्रो खेलकुद) – न्यु रोड टिम (एनआरटी) का मिडफिल्डर एरिक विष्ट दुई दिनको अस्पताल बसाईंपछि डिस्चार्ज भएका छन् ।

शनिबार भएको सातदोबाटो युथ क्लबविरुद्ध खेलमा टाउकोमा चोट लागेर बेहोस भएपछि उनलाई त्रिपुरेश्वरस्थित दशरथ रंगशालासँगै रहेको ब्लु क्रस अस्पताल लागिएको थियो । सुरुवाती दिन आवश्यक परिक्षण गरेपछि उनलाई अति सघन कक्ष (आइसीयु) मा राखिएको थियो । परिक्षणमा कुनै समस्या नदेखिएपछि उनलाई थप एक दिन अब्जरभेसनमा राखेपछि सोमबार डिस्चार्ज गरिएको हो ।

सातदोबाटोविरुद्ध खेलमा दुई पटक टाउकोमा चोट लागेपछि उनलाई परिवर्तन गरिएको थियो । बाहिर ल्याएपछि एक्कासी बेहोस भएका उनलाई एम्बुलेन्समा अस्पताल लगिएको थियो । उनको सिटी स्क्यान लगायत सम्पूर्ण रिपोर्टमा कुनै समस्या देखिएको छैन । यद्यपी उनलाई चिकित्सकले कम्तिमा एक साता पूर्ण रुपमा शारीरिक विश्राम लिन सुझाव दिएका छन् ।

एनआरटीले सातदोबाटोविरुद्ध १-० को जितसँगै लिगमा पहिलो जित हासिल गरेको थियो । अब शनिबार हुने थ्री स्टारविरुद्ध खेल एरिकले गुमाउने सम्भावना छ । एरिकले एनआरटीका लागि लिगको पहिलो खेलमा मच्छिन्द्रविरुद्ध फ्रिकिकमा दर्शनीय गोल गरेका थिए । चोट बोक्नुअघि लिगमा पूरै समय खेलेका उनले सेन्टर मिडफिल्ड सम्हाल्दै आएका छन् ।

राष्ट्रिय टोलीमा समेत रहँदै आएका एरिक साफ च्याम्पियनसिपमा भने चोटका कारण टोलीमा परेका थिएनन् । लिगमा राम्रो प्रदर्शन गरिरहेका उनले राष्ट्रिय टोलीमा पुनरागमन गर्ने बलियो सम्भावना छ ।