काठमाडौं (हाम्रो खेलकुद) – सहिद स्मारक ए डिभिजन लिगको पाँचौ चरणको खेल शुक्रबारदेखि सुरु हुँदैछ । खेलअघि सहभागी टोलीका प्रशिक्षकहरुले आफ्नो तयारी र विपक्षीबारे यसो भने :

नवीन न्यौपाने (आर्मी –मुख्य प्रशिक्षक)

सातदोवाटो अन्डरडग टोलीको रुपमा उभिएको छ । उसले निकै राम्रो प्रदर्शन गरिरहेको छ । सातदोबाटो एउटा बलियो प्रतिद्वन्द्वी हो । यो लिगमा सबै टोली उत्तिकै बलियो छन् । हरेक खेलमा हामी ३ अंकको लागि खेलिरहेका छौं । यसअघिको चार खेलको कमी कमजोरी सुधार गरेर खेल्नेछौं । सातदोबाटोले एनआरटीसँग हार भोगेपनि उनीहरुको प्रदर्शन राम्रो छ । हामीभन्दा अघि रहेका टोलीलाई दवाव बढाइरहनेछौं ।

सातदोबाटो सबै पक्षमा राम्रो रहेको छ । हामी आफ्नो पेशमा खेल्नेछौं । हामीले रिदम समातेका छौं, त्यो रिदमलाई मेन्टेन गर्दै अघि बढ्ने । हाम्रो ध्यान धेरैभन्दा धेरै अवसर सृजना गर्नेमा हुनेछ । पछिल्लो खेलमा हाम्रा दुवै स्ट्राइकरले गोल गरेका कारण हाम्रो अग्रप्रंक्तिको मनोबल बढेको छ ।

सुरज महर्जन (सातदोबाटो – सहायक प्रशिक्षक)

भोलिको खेल लिगकै उत्कृष्टमध्येको एक टोली आर्मी सँग छ । हामीले धेरै मिहेनत गरेका छौं । अघिल्लो कमी कमजोरी सच्याएर प्रशिक्षण गरिरहेका छौं । हामी ३ अंककै लागि खेल्ने हो । आर्मीविरुद्ध सुधारिएको खेल पस्कदै जित्ने लक्ष्यमा हुनेछौं । आर्मी कठिन प्रतिद्धन्द्धी हो । उ बलियो टोली हो तर, हामी ३ अंककै लागि खेल्नेछौं ।

प्रवेश कटुवाल (मछिन्द्र – मुख्य प्रशिक्षक)

संकटाले लिग चरणमा राम्रो फुटबल खेलिरहेको छ । उ चौथो स्थानमा रहेको छ । उसले पछिल्लो खेलमा पुलिसलाई हराएको थियो । त्यसअघि मनाङसँग बराबरी खेलेको थियो । त्यो हिसाबले संकटासँगको खेल प्रतिस्पर्धात्मक नै हुनेछ । संकटा राम्रो फर्ममा देखिएको छ ।

एएफसी कपका लागि संकटासँगको खेल नै महत्वपुर्ण छ । त्यसपछि मनाङसँग छ । भोलि जितेपछि अर्काे खेलको बारेमा सोच्ने छौं । मनाङ पनि एएफसी कपको दौडमा छ ।

किशोर कुमार केसी (जावलाखेल – मुख्य प्रशिक्षक)

खेल सबै कडा हुनेछ । त्यसमाथि च्यासल हामीभन्दा ३ अंकले माथि छ । हामीले कडा मिहेनत गरेदेखि च्यासलभन्दा माथि जान सक्नेछौं । मलाई विश्वास यो म्याचमा हामी गोल गर्दै जित्नेछौं । फुटबलमा ह्याकुलाले पेल्ने खेल हुनेछैन । ट्याक्टिकल र टेक्निकल हुने भएकाले यसलाई मध्यनजर राख्दै अघि बढ्नेछौं ।

हामी गोलकै खोजीमा छौं । हामीलाई किलिङ टचको आवश्यकता छ । त्यहीलाई मध्यनजर राख्दै प्रशिक्षण गरिरहेका छौं । त्यो टचले क्लबलाई माथि जान हौसला मिल्नेछ । जित हासिल गर्न नसक्दा खेलाडी, प्रशिक्षक र टिम व्यवस्थापन नै चर्को दवावमा छ ।

आशिक थापामपर (च्यासल – सहायक प्रशिक्षक)

खेल जितका लागि नै खेल्ने हो । च्यासलविरुद्ध हामी जसरी पनि जितकै लागि खेल्नेछौं । च्यासल र जावलाखेलको स्तर बराबरजस्तै हो । टफ हुनेछ । हामी तीन अंकका लागि खेल्नेछौं । हामीले अग्रपंक्ति सुधारका लागि कर्ण लिम्बुलाई अनुबन्ध गरेका छौं । रुमेश बर्ताैला र विकास मेराग्लिया चोटका कारण खेल्नेछैनन् । खेलबारे यहि नै भन्न सकिने अवस्था छैन ।

रविन्द्र शिलाकार (थ्री स्टार – सहायक प्रशिक्षक)

हामी तीन अंककै लागि तयारी गरिरहेका छौं । अघिल्लो खेलको कमजोरी सुधार गर्ने कोसिस गरिरहेका छौं । एनआरटीविरुद्ध जित्ने लक्ष्यमा मैदान उत्रने छौं । यो भन्दा अघिल्लो खेलमा अफेन्सिभ थर्डमा समस्या देखिएको थियो । हामीले त्यो ठाँउमा केही विदेशी खेलाडीलाई अनुबन्ध ल्याउन प्रक्रिया थालिसकेका छौं । जुन खेलाडी आउँदैछ । त्यो खेलाडीले आफ्नो जिम्मेवारी पूरा गर्न सक्यो भने थ्री स्टार आफ्नो पुरानो लयमा फर्किन्छ । दक्षिण एसियाली खेलाडीसँगको पेपर वर्क अन्तिम चरणमा छ ।

राजुकाजी शाक्य (एनआरटी – मुख्य प्रशिक्षक)

जहिले पनि एउटै कुरा भनेजस्तो हुन्छ । सबै टोली राम्रो र एकै स्तरका छन् । हामीले कसैलाई पनि कमजोर ठान्नु हुँदैन । हामीले चार खेलमा एक जित, दुई बराबरी र एक हार निकालेका छौं । हामीलाई ३ अंकको खाँचो छ, त्यो अनुसार योजना बनाएका छौं ।

थ्री स्टार पहिला जस्तो छैन । तर, सिनियर र जुनियर खेलाडीको तालमेल मिलेको छैन । हामीलाई पनि त्यस्तै भइरहेको छ । थ्री स्टार विगतभन्दा फरक नै छ । प्राय राष्ट्रिय खेलाडी राख्ने उनीहरु यसपटक युवा खेलाडीको भरमा लिग खेलिरहेको छ । पहिले थ्री स्टार र मनाङले राष्ट्रिय खेलाडीलाई राख्दै लिग च्याम्पियन भइरहेको थियो । यसपटक मछिन्द्रले आठ फरवार्ड राखेको छ । यो उसको पोलिसी होला, अर्काे टिमले फरवार्ड लैजान्छ भन्ने होला ।

विजेन्द्र पुडासैनी (हिमालयन शेर्पा – व्यवस्थापक)

प्रशिक्षक (युगलकिशोर राई) अस्वस्थ रहेका कारण म उपस्थित भएको छु । हामी २ अंकमा छौं । गोल निस्किरहेको छैन । जित्ने लक्ष्यका साथ खेल्नेछौं । हामीले रणनीति परिवर्तन गरी अगाडि बढ्नुपर्नेछ । ब्रिगेड ब्वाइजलाई कमजोर आँकेका छैनौं ।

यस लिगमा कमजोर कोही छैन । दुई टिम रेलिगेसन र एक टोली विजेता बन्ने छ । ८ अंकले पछि परिसकेका कारण हाम्रो उपाधि सम्भावना छैन । हामी टप सिक्सको लागि ब्याटल गर्ने र त्यो हुन नसकेमा रेलिगेसन ब्याटल गर्नेछौं ।

मृगेन्द्र मिश्र (फ्रेन्ड्स – मुख्य प्रशिक्षक)

पाँचौं चरणसम्म हामीले २ अंक मात्रै जोडेका छौं । एपिएफसँगको खेलका लागि राम्रै तयारी भएको छ । दुई घाइते खेलाडी टोलीमा फर्किएका छन् । कप्तान प्रकाश बुढाथोकीले नवौं चरणसम्मको खेल गुमाउने छन् । यसपल्ट एपिएफमाथि जित निकाल्ने लक्ष्यमा छौं । तर सजिलो छैन ।

लगातार तीन खेल हारेपछि एपीएफले पहिलो बराबरी निकालेको थियो । त्यसले उनीहरुको मनोवल बढाएको छ । उनीहरु ब्याडलकले हारेको । उनीहरु राम्र्रै टोली हो । कोही भन्दा कोही टोली कमजोर छैन । सबै बराबर छ । मछिन्द्र केही माथि छ । तर, उनीहरुलाई पनि गाह्रो नै छ ।

रत्नकाजी महर्जन (एपिएफ – सहायक प्रशिक्षक)

चार खेलमा हाम्रो १ अंकमात्र छ । हामीलाई दवाव छ । यो फ्रेन्ड्सविरुद्धको खेलमा हामीलाई रेलिगेसन जोनबाट उम्कन तीन अंकको खाँचो छ । पछिल्लो खेलमा हामीले सुधारिएको प्रदर्शन गरेपनि फिनिसिङ राम्रो भएन । त्यसलाई केन्द्रित गरेर प्रशिक्षण गरिरहेका छौं ।

अहिलेको अवस्थामा यो खेललाई रेलिगेसन ब्याटल भन्दा फरक पर्ने छैन । हाम्रो टोलीको खेल सुधार हुदै गइरहेको छ । मलाई मेरो टोलीप्रति विश्वास छ । हाम्रो लक्ष्य शीर्ष आठसम्मको हो । लिगका लागि विदेशी खेलाडी अनुबन्धको प्रक्रिया अन्तिम चरणमा पुगेको छ । एकजना अफ्रिकी राष्ट्र र अर्काे एसियाली कोटाको रहेका छन् । कागजी प्रक्रिया पूरा भए उनीहरु यही चरणदेखि उपलब्ध हुनेछन् ।

पोखरामा खेल हुने मनाङ र पुलिस तथा संकटा र बिबिसीका प्रतिनिधि कार्यक्रममा उपस्थित थिएनन्

पाँचौ चरणको खेल तालिका :