एजेन्सी – आफ्नो ११ सिनियर खेलाडीविनै स्पेनिस ला लिगाको शीर्षस्थानमा रहेको रियल म्याड्रिडले आज (बुधबार) राति एथलेटिको बिल्वाओसँग उसकै मैदानमा प्रतिस्पर्धा गर्दैछ ।

खेल सान मामेस बिल्वाओमा नेपाली समयअनुसार बुधबार बिहान २ः१५ बजे हुनेछ । सिनियर ११ खेलाडी अनुपस्थित रहेपनि रियल घरेलु टोलीलाई पराजित गर्दै आफ्नो शीर्षतालाई थप मजवुत बनाउने लक्ष्यमा हुनेछ । रियल १८ खेलबाट ४३ अंक जोडेर शीर्षस्थानमा रहेको छ ।

बिल्वाओ २४ अंक जोडेर १०औं स्थानमा छ । सिनियर ११ खेलाडीलाई चोट र कोरोना पुष्टि भएपछि बिल्वाओविरुद्ध प्रशिक्षक कार्लाे एन्सेलोटीले एकेडेमीका ७ खेलाडीलाई टोलीमा समेटेको छ ।

लस ब्लान्कोस सुरुवाती ११ मा कुनै समस्या नरहेपनि बेन्चका कारण समस्यामा पर्न सक्नेछन् । एकेडेमीका सातमध्ये दुई गोलरक्षक टोनी फुइडियास र डिएगो पिनेरो पहिलो रोजाईका थिवाउट कोर्टुवाको सारथी हुनेछन् । राफा मारिन, मिगुएल गुटेरेज, एन्टेनियो ब्लान्को, पिटर फेडरिको र सर्जियो एरिबास टोलीमा समेटिएका हुन् ।

मारिन – मिलिसाओ र नाचोको विकल्प

राफा मारिन सेन्टर ब्याक हुन् । इडर मिलिसाओ र नाचो फर्नान्डेसको विकल्पमा उनलाई टोलीमा समेटिएको हो । यि तीनै जना अनुपस्थित रहेमा जेसस भालेजो पनि विकल्पमा रहेको छ ।

मिगुएल र ब्लान्को – अलि बढी अनुभवी

लेफ्ट ब्याक मिगुएल गुटेरेज सिनियर टोलीका लागि अनुभवी नाम हो । उनले यो सिजन पनि रियलका लागि खेलिसकेका छन् । त्यसैले एन्सेलोटीलाई थाहा छ कि आवश्यक रहेमा उनलाई प्रयोग गर्न सकिन्छ । एन्टोनियो ब्लान्कोले पनि सिनियर टोलीमा स्थान बनाइसकेका छन् । अट्याकिङ मिडफिल्डर ब्लान्कोले क्यासमिरो र इडुआर्डाे कामाभिंगाको स्थानमा खेल्न सक्नेछन् ।

उत्साहित पिटर फेडरिको

१९ वर्षीय विंगर क्याडिजविरुद्धको खेलमा बेन्चमा रहेका थिए । प्रशंसकहरुले क्याडिजविरुद्ध पिटरले खेल्ने आँकलन गरेका थिए । बराबरीमा सकिएको खेलमा एन्सेलोटीले इडेन हाजार्डलाई नै रोज । सान मामेसमा उनले मौका पाउने सम्भावना छ । उसको ड्रिब्लिङ कौशल एथलेटिको बिल्वाओविरुद्धको बलियो रक्षापङ्तिका लागि उपयोगी सावित हुन सक्छ ।

एरिबास

२० वर्षीय एरिबास अट्याकिङ मिडफिल्डर हुन् । उनलाई क्लबमा सबैले सम्मान गर्दछ । प्रायः जिनेदिन जिदानले टोलीमा मौका पाएको उनले एन्सेलोटीको मन जित्न सकिरहेको छैन । यो कोभिडको संकटले उनले पहिलो टोलीमा ढोका खेल्न सक्नेछ ।