काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगमा यसपटक दर्शकको रुची बढेको छ । दुई वर्ष अघि दर्शक तान्नका लागि पुरस्कारको समेत व्यवस्था गरेको अखिल नेपाल फुटबल संघ (एन्फा) ले यसपटक व्यवस्थापनमा थोरै सुधार गर्दा पनि दर्शकमा लिग हेर्न दशरथ रंगशालामा आइरहेका छन् ।

मनाङ मर्स्याङ्दी क्लब र मछिन्द्र फुटबल क्लबबीच शनिबार भएको खेलमा जारी लिगका सर्वाधिक दर्शकको उपस्थित रहेको छ । एन्फाका अनुसार मनाङ र मछिन्द्रको खेल झण्डै १० हजार दर्शकले प्रत्यक्ष रुपमा दशरथ रंगशालामा पुगेर खेल हेरेका छन् । सुनिल बलले इन्ज्युरी समयमा गरेको गोलमा मनाङलाई १–० ले हराउँदै मछिन्द्र शीर्ष स्थानमा उक्लेको छ ।

एएफसी कप छनोटका लागि महत्वपूर्ण रहेको खेल भएका कारणले पनि त्यसमा दर्शकको सर्वाधिक उपस्थित रहेको आँकलन छ । मनाङले जित्न सकेको भए सातौं चरणको खेलअघि नै एएफसी कप छनोटमा पुग्ने थियो । मछिन्द्रको जितले भने अब सातौं चरणमा मात्र छनोट हुने टोलीको टुंगो लाग्नेछ ।

शीर्षस्थानको मछिन्द्रको १४, मनाङ १३ र एक खेल कम खेलेको त्रिभुवन आर्मी क्लबको ९ अंक छ । आर्मीले आइतबार थ्री स्टारलाई हराएको खण्डमा उसको १२ अंक पुग्नेछ । त्यसपछि सातौं चरणको खेल झनै रोचक हुने सम्भावना रहन्छ । यी शीर्ष ३ टोली र एपिएफ फुटबल क्लबले मात्र नेपालबाट एएफसीको क्लब च्याम्पियनसिपमा भाग लिन पाउछन् । क्लब लाइसेन्स प्राप्त नगर्ने टोलीले एएफसीको प्रतियोगिता खेल्न पाउँदैनन् ।

लिगमा उपाधिको दौड रोचक बन्दै जाँदा दर्शकको संख्या अझै बढ्ने सम्भावना देखिएको छ । शनिबार अघि एन्फाका अनुसार आर्मी र मछिन्द्रबीचको १४ औं खेल र हिमालयन शेर्पा क्लब र मछिन्द्रबीचको खेलमा पनि ४ हजार दर्शकले रंगशाला पुगेर खेल हेरेका थिए ।

लिग निर्देशक सञ्जिव मिश्रका अनुसार पहिलो खेलका पनि झण्डै आधा दर्शकले दोस्रो खेल पनि हरेका थिए । हिमालयन शेर्पा क्लबले च्यासल युथ क्लबलाई ३–१ ले हराएको खेलमा २२ सय दर्शक उपस्थित रहेको बताएको छ । ‘आज दर्शकको उपस्थिति अपेक्षा गरे अनुसार नै थियो’, मिश्रले भने, ‘क्लब, खेलाडी, परिषद्का कर्मचारी, क्लबका पदाधिकारी, भिआइपीलाई एन्फाले पासको व्यवस्था गरेको हुन्छ । त्यसबाहेक टिकट काटेरै दर्शकले फुटबल हेर्दै आएका छन् ।’

एन्फाले सजिलो पेलाई १ करोड रुपैयाँमा टिकट विक्रीको जिम्मेवारी सजिलो पेलाई दिएको थियो । लिगमा शनिबार ३९ औं खेल सकिएको छ । त्यसमा मनाङ र पुलिसबीचको एउटा खेल पोखरा रंगशालामा भएको थियो । बाँकी सबै खेल दशरथ रंगशालामा भएको थियो । अबका बाँकी ५२ खेलमध्ये २ खेल पोखरामा र बाँकी दशरथ रंगशालामा हुनेछ ।

फ्लड लाइडमा पहिलो पटक लिग, शुक्रबार देखि सोमबार सम्ममा लिग आयोजना गर्नाले पनि यसपटक दर्शक बढेको विश्वास गरिएको छ । कतिपयले सहभागी क्लबको स्तरमा धेरै अन्तर नभएकाले खेलहरु प्रतिस्पर्धात्मक हुने गरेकोले पनि दर्शकको रुची बढेको विश्वास गरिएको छ ।