काठमाडौं (हाम्रो खेलकुद)– कतार एअरवेज सहिद स्मारक ए डिभिजन लिगको छैटौं चरणको समाप्तीमा आइपुग्दा जावलाखेल युथ क्लबका प्रशिक्षक किशोर केसी खुसीमात्र होइन आत्मविश्वासी पनि देखिएका छन् ।

सुरुवाती ३ खेलमा लगातारको हारबाट निराश रहने गरेका केसीको टोलीले पछिल्लो ३ खेलमा ७ अंक जोडेपछि उनीमा बेग्लै जोश र उत्साह देखिएको छ । लिगमा लगातार दोस्रो जित निकाल्ने क्रममा जावलाखेलले सातदोबाटो युथ क्लबलाई २–० ले हराउँदै अंकतालिकाको ११ औंबाट नवौं स्थानमा उक्लेको छ । दोस्रो हाफमा विपिन कँडेल र निकोलस फर्नान्डेसले गोल गरेपछि जावलाखेल लिगमा दोस्रो जित निकाल्न सफल भएको थियो । सुरुका ३ खेलमा हार बेहोरेको जावालखेलले चौथोमा बराबरी तथा पाँचौं र छैटौं खेलमा जित निकालेको छ ।

प्रशिक्षक केसीले खेलपछि विपिनको खुलेर प्रशंसा गर्दै उनलाई आफ्नो कमाण्डोको संज्ञा दिए । राष्ट्रिय टोलीका खेलाडी समेत रहेका सुरजज्यू ठकुरीको सट्टा केसीले दोस्रो हाफमा विपिनलाई मौका दिएका थिए । उनै विपिनले ५० औं मिनेटमा जावलाखेलका लागि पहिलो गोल गरेका थिए । ओनगुना जुनियरको क्रसलाई पासाङ लामाले क्लियर गर्न नसकेको बललाई विपिनले नियन्त्रणमा लिदै गोल गरेका थिए ।

‘राष्ट्रिय खेलाडीलाई परिवर्तन गरे । त्यो आँट लिए । कमाण्डो (विपिन) पठाएँ’, जावालखेका प्रशिक्षक केसीले भने, ‘उसले सहि काम गर्दियो । विपिनले के के गर्यो । कस्तो खेल्यो तपाईहरुले पनि देख्नु भयो होला । देशलाई चाहिने खेलाडी हो । जजमेन्ट राइट भयो । आज जितेपछि म त हिरो नै हो नी ।’

सुरज ज्यूको प्रदर्शनको उनले दोहोराएर आलोचना गरेका छन् । ‘सुरजले जनता झुक्याउने खेल खेल्दिन्छ । तपाईहरुलाई पनि झुक्याउन सक्छ’, केसीले थपे,‘ नबुझ्ने कोच भए खत्तम बनाउँछ । टेक्निकल गेम खेल्न सक्नुपर्छ । झुक्याउने खेल खेल्न भएन । त्यसैले मैले चेन्ज गरेको हुँ । मलाई पनि माया लाग्छ । कोच आएर हेर्ने खेल होला । निकाल्दा मलाई नि राम्रो लागेको छैन । तर उसलाई ननिकाल्दा सम्म गोल निस्कदैन त के गरौं ।’

केसीले जितमा टोलीका खेलाडीलाई पनि धन्यवाद दिए । ‘राम्रो खेल्यौं । अझै पनि बल पोलमा लागिरहेको छ । यसले छाडेको छैन’, हाँस्दै केसीले भने, ‘टेबलमा पनि माथि सरेको छ खुसी छु ।’

उनले सातदोबाटोसँगको प्रतिस्पर्धालाई दाजु भाईको लडाईको संज्ञा पनि दिए । सातदोबाटोका प्रशिक्षक मेघराज केसी हुन् । ‘सातदोबाटोलाई अण्डरडग भन्ने गरिएको छ । सबैलाई उसले राम्रो फाइट दिएको टिम हो । दाजुभाईको लडाईं हो, हामी केसी केसी हो,’ उनले अगाडि भने, ‘हामी दुवैको पोलेसी फेयर खेल्ने हो । त्यसमा विश्वास गरेरर अघि बढ्ने हो । त्यो चुनौती सातदोबाटोले दिएको थियो ।’

सातदोबाटोका प्रशिक्षक केसीले भने अघिल्ला खेलहरुमा देखाएको स्तरलाई आफ्नो टोलीले निरन्तरता दिन नसकेको बताए । ‘आज अपरिपक्क टोलीको जस्तो प्रदर्शन भयो । अघिल्ला खेलहरुको प्रदर्शनलाई निरन्तरता दिन नसक्दा हार बेहोर्नुपर्यो, उनले भने,‘ नेपाल फुटबलमा एकै स्तरको प्रदर्शन हुँदैन । हामीले त्यसलाई एकै नासको बनाउनुपर्ने हुन्छ ।’

उनले खेलाडीहरु बढी आत्मविश्वासी भएको पनि हुन सक्ने आँकलन गरे । ‘आफूभन्दा तल रहेको टोलीसँग खेल्ने हो भनेर सकि हाल्छौं भन्ने भएको हुन सक्छ’, उनले भने, ‘खेल भन्दा अघि नै बढी कन्फिडेन्स आएको पनि हुन सक्छ । हामीले त्यसमा सुधार गर्न आवश्यक छ ।’