कोरोनाले थलिएको २ वर्षपछि अहिले कोरोनाको नयाँ भेरियन्ट ओमिक्रोन देखा परेको छ । मोफसलकै लोकप्रिय प्रतियोगिता आहारारा गोल्डकप फुटबल प्रतियोगिताले फेरि पनि कोरोनाको चुनौती सामना गर्नुपर्ने देखिएको छ ।

नेपालमा कोरोना संक्रमितको संख्यामा वृद्धि हुँदै जादाँ गण्डकी प्रदेश सरकार स्वास्थ्य मन्त्रालयले विज्ञप्ती नै जारी गर्दै मेला, महोत्सव तथा भिडभाड नगर्न र अनिवार्य रुपमा मास्कको प्रयोग गर्न अनुरोध गरिरहँदा प्रतियोगितालाई भने असर गर्ने खतरा देखिएको छ ।

यद्यपी पोखरा रंगशालामा १६ हजार ५ सय दर्शक क्षमताको प्यारापिट रहेका कारण सामाजिक दुरी कायम गराउँदै प्रतियोगितालाई सम्पन्न गराउने तरखरमा आयोजक सहारा क्लब देखिएको छ । तर विगत केही समय देखि सहभागि टिमको संख्या भने घटेको छ । १२ टिमको सहभागिता रहँदै आएको प्रतियोगितामा १० टिमको मात्रै सहभागिता रहने भएको हो । २० औं संस्करणमा १२ टिम नै आउने भनिएपनि १० टिमको मात्रा सहभागिता रहने भएको हो ।

सहाराले माघ ६ गतेबाट १५ गते सम्म २० औं संस्करणको आहा ! रारा गोल्डकप फुटबल प्रतियोगिता प्रतियोगिताको आयोजना गर्दैछ । सोमबार पत्रकार सम्मेलन गर्दै प्रतियोगिता आयोजनाको सम्पूर्ण तयारी भएको महासचिव रामजीप्रसाद अधिकारीले जानकारी दिए । उनका अनुसार प्रतियोगिता तोकिएकै समयमा हुनेछ ।

क्लबका अध्यक्ष सुरज गुरुङ (हरीराम) ले प्रतियोगिता संचालनगर्नका लागि प्रशासनसंग समन्वय भइरहेको बताए । उनले निश्चित दर्शक राखेर प्रतियोगिता आयोजना गर्नका लागि स्वास्थ्य तथा सुरक्षा निकायहरुसंग छलफल भइरहेको जानकारी दिए । ‘हामी सबै खोप लगाइसकेका छौ । सामाजिक दुरी कायम गरेर प्रतियोगिता गर्ने सोचमा हामी रहेका छौ’ उनले भने,‘ अब सरकारले लकडाउननै ग¥यो भने त हामीले पनि केहि गर्न सक्दैनौ राज्यको निदेर्सन पालना सबैले गर्नै पर्छ । हामीले अनुमति लिएरै प्रतियोगिता गर्ने तयारी गरिरहेका छौ ।’

प्रतियोगितामा आयोजक सहारा क्लब, अमेरिकाको बि.वाई.एस.सी सहित ३ विभागीय क्लब नेपाल पुलिस, एपिएफ र त्रिभुवन आर्मी तथा संकटा, मनाङ मस्र्याङ्दी, थ्रिस्टार, मछिन्द्र र हिमालयन शेर्पा क्लबको सहभागिता रहने छ । प्रतियोगिताबाट १ करोड ३६ लाख १ हजार रुपैँया आम्दानी हुने अनुमान गरिएको छ भने १ करोड ६ लाख ४८ हजार ५ सय रुपैँया खर्च हुने महासचिव अधिकारीले जानकारी दिए ।

अघिल्लो वर्ष कोरोनामहामारीका कारण आयव्यय सार्वजानिक गर्न नसकेको सहाराले सोहि सन्दर्भमा आयव्यय समेत सार्वजानिक गरेको थियो । १९ औं संस्करणमा ७६ लाख ५० हजार ६ स ४७ रुपैया आम्दानी भएको थियो । भने, १३ लाख ४९ हजार ४ सय ४७ रुपैँया बचत तथा ६३ लाख १ हजार १९९ रुपैँया खर्च भएको बताइएको छ ।

क्लबले पोखराको फुटबल खेललाई जिवन्त राख्न निरन्तर प्रतियोगिताको आयोजना गर्दै आइरहेको छ । क्लबले शसस्त्र जनयुद्धकाल होस या कोरोना महामारी प्रतियोगितालाई निरन्तरता दिइरहेको छ । प्रतियोगिता आयोजना गर्नुको मुख्य लक्ष्य एकेडेमी संचालन गर्न हो । सूर्यबहादुर केसी स्मृति सहारा फुटबल एकेडेमीमा हाल १४ जिल्लाका २४ बालकहरु आश्रित छन् । क्लबले अनाथ तथा असाहय बालबकहरुलाई पालनपोषणका साथमा फुटबल समेत सिकाउँदै आइरहेको छ ।