काठमाडौं (हाम्रो खेलकुद)– राष्ट्रिय टोलीका रक्षक अनन्त तामाङ चोटका कारण कम्तीमा दुई महिना मैदान बाहिर रहने भएका छन् ।

नेपालको उमेर समूहदेखि सिनियर टोलीले पछिल्ला १५ महिनामा प्राप्त गरेका ४ सफलतामा उनी महत्वपूर्ण सदस्य रहेका थिए । अनन्तलाई एएफसी सोलिडारिटी कपको सेमिफाइनललाई चोट लागेको थियो । लाओससँगको सेमिफाइनलमा विपक्षी खेलाडीसँग ठोक्किएर उनको घुँडामा चोट लागेको थियो । चोटका वावजुद उनले मकाउविरुद्ध फाइनल खेलेका थिए । लाओससँग २–२ को बराबरी भएको खेलमा अनन्तले गोल गरेका थिए । त्यो उनको पहिलो अन्तर्राष्ट्रिय गोल थियो ।

सोलिडारिटी कपको फाइनल खेलेपनि उनले गत शनिबार फ्रेन्ड्स अफ जापानसँगको मैत्रीपूर्ण खेल खेलेनन् । सोलिडारिटी कप, त्यसअघि दक्षिण एसियाली खेलकुद (साग), बंगबन्धु गोल्डकप र साफ १९ उपाधि जित्दा अनन्त सबै टोलीमा थिए । एन्फा एकेडेमीका उत्पादन अनन्तलाई रोहित चन्दको विकल्पका रुपमा पनि हेरिएको छ । उनी सेन्टर डिफेन्डरका रुपमा खेल्दै आएका छन् । लावसविरुद्ध महत्वपूर्ण गोल गरका उनले त्यो खेलमा विपक्षीका दुई खतरनाक आक्रमणलाई रोकेका थिए । त्यसमध्ये एक उनले गोललाइनबाट क्लियर गरेका थिए ।

चिकित्सकले घुँडाको शल्यक्रिया गर्नुपर्ने सम्भावना रहेको बताएका अनन्तले अब आठ साता भने आराम गर्ने हाम्रो खेलकुदलाई जानकारी दिए ।