पोखरा (हाम्रो खेलकुद) – अमेरिकी टोली भुटानिज युथ स्पोर्ट्स क्लब (बिवाइएससी) लाई पराजित गर्दै नेपाल एपिएफ फुटबल क्लब २० औं आहा रारा गोल्डकप फुटबल प्रतियोगिताको सेमिफाइनलमा प्रवेश गरेको छ ।
पोखरा रंगशालामा शनिबार भएको पहिलो क्वाटरफाइनलमा एपिएफले ३-१ को जित दर्ता गर्दै अन्तिम चारमा प्रवेश गर्न सफल भएको हो । खेलको पहिलो हाफ गोलरहित बराबरीमा सकिएपनि दोस्रो हाफमा तीन गोल सम्भव भएको थियो । बिवाइएससीले खेलमा सुरुवाती अग्रता बनाएपनि एपिएफले त्यसपछि दुई गोल फर्काउँदै जित हासिल गरेको हो ।
दोस्रो हाफको ४८ औं मिनेटमा बिवाइएससीले सुरुवाती अग्रता लिएको थियो । मिगेल पालाफक्सले हेडरमार्फत गोल गर्दै पाहुना टोलीलाई गर्त दिलाए । राइली युरीको क्रसमा निअर पोस्टमा राजन गुरुङको हेडर क्लिअरेन्स सटिक हुन नसक्दा फार पोस्टमा अनमार्क रहेका मिगेलले सहजै गोल गरेका थिए ।
६९ औं मिनेटमा एपिएफले आवास लामिछानेको पेनाल्टीमार्फत खेल बराबरीमा ल्यायो । ६ यार्ड बक्सभित्र अर्मान्ड बदोममाथि फल भएपछि रेफ्री नविन्द्र महर्जनले विभागीय टोलीलाई पेनाल्टी दिएका थिए । आवासले उक्त पेनाल्टीमा गोल गर्दै खेल १-१ को बराबरीमा ल्याए ।
८४ औं मिनेटमा वैकल्पिक खेलाडी रवि थिङले गोल गर्दै एपिएफलाई अघि बढाए । आवासको थ्रु पासलाई रविले पेनाल्टी क्षेत्रको दायाँ भागबाट उत्कृष्ट फिनिस गर्दै अग्रता दिलाए ।
इन्ज्युरी समयमा रविले व्यक्तिगत दोस्रो गोल गर्दै एपिएफको जित सुनिश्चित गरे । पेनाल्टी क्षेत्रको ठिक बाहिरबाट उनले गरेको शक्तिशाली प्रहारलाई बिवाइएससीका कप्तानले कुनै अवसर पाएनन् ।
एपिएफले अब सेमिफाइनलमा सोमबार हुने संकटा र मछिन्द्रबीचको विजेतासँग खेल्नेछ । आइतबार प्रतियोगिता अन्तर्गत मनाङ मर्स्याङ्दी क्लब र नेपाल पुलिस क्लबबीच खेल हुनेछ ।
प्रतियोगितामा ए डिभिजनका ८ सहित १० टोलीले सहभागिता जनाएका छन् । आहा गोल्डकपको विजेताले उपाधिसहित १० लाख १ हजार रुपैयाँ र दोस्रो हुनेले टोलीले ५ लाख १ हजार रुपैयाँ प्राप्त गर्नेछ । प्रतियोगितामा १ करोड ६ लाख ४८ हजार ५ सय रुपैयाँ खर्च हुने अनुमान गरिएको छ ।
पहिलो वर्ष क्याराभान गोल्ड कपसहित २१ वर्षदेखि निरन्तर सञ्चालन भएको यस प्रतियोगितामा बचत हुन आएको रकम क्लबद्वारा संचालित सुर्य बहादुर केसी स्मृति सहारा फुटबल एकेडेमीमा खर्च गरिनेछ । एकेडेमीमा हाल तेस्रो ब्याचमा १४ जिल्लाका २४ जना बालकहरु आश्रित छन् । २०७० साल देखि उनीहरु आवसिय रुपमा निशुल्क स्वास्थ्य, शिक्षा दिक्षा लगायत फुटबल प्रशिक्षण समेत सहारा फुटबल एकेडेमी गण्डकी प्रदेश, पोखरा–१७ स्थित दोविल्लामा प्रदान गर्दै आईरहेका छ ।
आहा रारा गोल्डकपको खेल तालिका तथा नतिजाको लागि यहाँ थिच्नुहोस
