पोखरा (हाम्रो खेलकुद)– आहा! गोल्डकप फुटबल प्रतियोगिताको पहिलो सेमिफाइनलमा बुधबार नेपाल एपिएफ क्लब र सहिद स्मारक ए डिभिजन लिगको शीर्ष टोली मछिन्द्र फुटबल क्लबबीच प्रतिस्पर्धा हुँदैछ । खेल पोखरा रंगशालामा दिउँसो २:३० बजे सुरु हुनेछ ।

एपिएफ दुई खेल जित्दै सेमिफाइनल पुग्दा मछिन्द्र एक खेल जितेर अन्तिम चारमा पुगेको थियो । आयोजक सहारा क्लबमा पहिलो खेलमा हराएको एपिएफले अर्को खेलमा बिवाईएससीलाई पराजित गरेको थियो । सिधै क्वार्टरफाइनल खेलको मछिन्द्रले साविक विजेता संकटालाई हराउँदै अन्तिम चारको यात्रा तय गरेको थियो । मछिन्द्रले लिगको टोलीबाट केही परिवर्तन गर्दै एनआरटीका मेसुके ओलोमोउ र फ्रेन्ड्सका नथानिएल जुड गार्सियालाई टोलीमा समेटेको छ ।

लिगमा अपेक्षा अनुसार प्रदर्शन गर्न नसकेको एपिएफले आहामा भने सानदार प्रदर्शन गरिरहेको छ । मछिन्द्रले भने लिगमा अपराजित रहेको छ । नवौं चरण (एक खेल बाँकी) को खेलको समाप्तीमा २३ अंकका साथ मछिन्द्र लिगको शीर्षस्थानमा छ ।

बिहीबार हुने अर्को सेमिफाइनल ६ पटकको विजेता रहित सकेको मनाङ मर्स्याङ्दी क्लब र त्रिभुवन आर्मी फुटबल क्लबबीच हुनेछ । मनाङले अर्को ६ पटकको विजेता नेपाल पुलिस क्लबको चुनौतीलाई पन्छाएको थियो । आर्मी भने ५ पटकको विजेता थ्री स्टारलाई हराउँदै सेमिफाइनल पुगेको थियो ।

क्वार्टरफाइनल सम्म विना दर्शक सञ्चालित आहा गोल्ड कपको सेमिफाइनल र फाइनलमा भने दर्शकलाई प्रवेश दिइने भएको छ । १६ हजार दर्शक क्षमता भएको रंगशालामा झण्डै ५ हजार ५ सय दर्शकलाई प्रवेश दिइने आयोजक सहाराले प्रेस विज्ञप्तीमार्फत जानकारी दिएको थियो । खेल हेर्नका लागि प्रति टिकट ३ सय रुपैयाँ तोकिएको छ । खेल हेर्न जाने दर्शकले कोरोनाविरुद्धको खोप लगाएको कार्ड अनिवार्य रुपमा साथमा लानुपर्नेछ ।

आहा! गोल्ड कपको विजेताले उपाधिसहित १० लाख १ हजार र दोस्रो हुने टोलीले ५ लाख १ हजार रुपैयाँ प्राप्त गर्नेछ । २० औं संस्करणको आहा गोल्डकपमा सहिद स्मारक ए डिभिजनका ८ सहित १० टोलीको सहभागिता थियो ।

आहा रारा गोल्डकपको सम्पूर्ण खेल तालिका तथा नतिजाको लागि यहाँ थिच्नुहोस