काठमाडौं (हाम्रो खलकुद)– विराटनगर सिटी एफसीले मार्की खेलाडीका रुपमा रञ्जित धिमाललाई निरन्तरता दिएको छ । अर्को महिना आयोजना हुने दोस्रो संस्करणको नेपाल सुपर लिगका लागि विराटनगरले धिमाललाई निरन्तरता दिएको हो । विराटनगरले बिहीबार प्रेस विज्ञप्तीमार्फत रञ्जितलाई मार्की खेलाडीका रुपमा अनुबन्धन गरेको जनाएको छ ।

रञ्जित मछिन्द्र फुटबल क्लबले सहिद स्मारक ए डिभिजन लिगको उपाधि रक्षा गर्दाका महत्वपूर्ण सदस्य हुन् । २०७६ मा मछिन्द्रले पहिलो पटक लिग जित्दा पनि उनी त्यसका सदस्य थिए । रञ्जित नेपालले सन् २०१६ सोलिडारिटी कप टोलीमा थिए ।

विराटनगरले रञ्जितले मैदान भित्र र बाहिर पनि टोलीको नेतृत्व सम्हाल्नेमा विश्वस्त रहेको जनाएको छ । प्रदेश एकका प्रेरणादायी खेलाडीका रुपमा रहेको उनमा विजयी मानसिकता रहेको पनि क्लबले जनाएको छ । रञ्जित मोरङ उर्लाबारीका स्थायी बासिन्दा हुन् । उनले थ्री स्टार, एपिएफ, एनआरटी बाट पनि व्यवसायिक फुटबल खेलिसकेका छन् । विराटनगरले उल्रिच सेवालाई पनि पुनः क्लबमा आबद्ध गराएको छ ।

विराटनगरले ए डिभिजन लिग क्लबको प्रशिक्षकका रुपमा यसै सिजन डेब्यू गरेका विष्णु गुरुङलाई मुख्य प्रशिक्षक नियुक्त गरेको छ ।

नेपाल स्पोर्टस् एण्ड इभेन्ट म्यानेजमेन्ट (एनइएसएम)को आयोजनामा चैत २६ गतेबाट सुरु हुने भनिएको एनएसएलको दोस्रो संस्करणमा यसपटक ३ नयाँ टिम थपिएपछि कुल १० टिमले प्रतिस्पर्धा गर्ने यसअघि नै पत्रकार सम्मेलनमार्फत जानकारी गराइएको थियो । आयोजकले शुक्रबार खेलाडी अक्सन गर्ने जनाएको छ । अक्सनका लागि २ सय ४२ खेलाडीलाई तीन क्याटगोरीमा विभाजन गरिएको छ ।

एनएसएलमा धनगढीसहित विराटनगर सिटी फुटबल क्लब, काठमाडौं रेजर्स, ललितपुर सिटी एफसी, एफसी चितवन, पोखरा थण्डर्स, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची रहेका छन् । यसपटक एनएसएल पोखरा र काठमाडौंमा हुने भनिएको छ ।