काठमाडौं (हाम्रो खेलकुद)– मछिन्द्र फुटबल क्लबका कप्तान सुजल श्रेष्ठ नेपाल सुपर लिग (एनएसएल) टोली पोखरा थन्डर्सको मार्की खेलाडी घोषित भएका छन् । पोखराले सुजललाई आफ्नो मार्की खेलाडीका रुपमा बिहीबार सम्झौता गरेको छ ।

गत वर्ष अक्सनमा सर्वाधिक २ लाख रुपैयाँमा विक्री हुने मध्येका एक सुजलले चोटका कारण एनएसएल गुमाउनु परेको थियो । खेलाडीका रुपमा मैदानमा उत्रन नसकेपनि पोखराले सुजललाई व्यवस्थापकको जिम्मेवारी दिएको थियो । यसपटक भने पोखराले मार्की खेलाडीका रुपमा क्लबमा भित्राएको छ ।

अर्को महिना सुरु हुने एनएसएलका लागि सहभागी १० टोलीले मार्की खेलाडी घोषित गरिरहेका छन् । बिहीबार नै काठमाडौं रेजर्स र विराटनगर सिटी एफसीले मार्की खेलाडीसँगै मुख्य प्रशिक्षक घोषणा गरेको थियो । काठमाडौं रेजर्सले विकेश कुथुलाई र विराटनगरले रञ्जित धिमाललाई मार्की खेलाडीका रुपमा निरन्तरता दिएको घोषणा गरेको थियो ।

त्यस्तै काठमाडौंले बालगोपाल महर्जनलाई मुख्य प्रशिक्षकमा निरन्तरता दिएको छ । विराटनगरले भने विष्णु गुरुङलाई मुख्य प्रशिक्षक नियुक्त गरेको छ । विष्णले यसपटक ए डिभजिन लिगमा प्रशिक्षकका रुपमा डेब्यू गर्ने क्रममा संकटा क्लब सम्हालेका थिए । संकटाले सातौं स्थानमा रहँदै लिगको अन्त्य गरेको थियो । यसअघि झापा एफसीले मनाङ मस्र्याङ्दी क्लबका कप्तान अन्जन विष्ट मार्की खेलाडी घोषणा गरेको थियो । त्यस्तै धनगढी एफसीले विशाल राईलाई मार्की खेलाडीमा निरन्तरता दिएको छ ।

नेपाल स्पोर्टस् एण्ड इभेन्ट म्यानेजमेन्ट (एनइएसएम) को आयोजनामा चैत २६ गतेबाट सुरु हुने भनिएको एनएसएलको दोस्रो संस्करणमा यसपटक ३ नयाँ टोली थपिएपछि कुल १० टोलीबीच प्रतिस्पर्धा हुनेछ । आयोजकले शुक्रबार खेलाडी अक्सन गर्ने जनाएको छ । अक्सनका लागि अखिल नेपाल फुटबल संघ (एन्फा) ले २ सय ४२ खेलाडीलाई तीन क्याटगोरीमा विभाजन गरेको छ ।

एनएसएलमा धनगढी, विराटनगर, काठमाडौं रेजर्स, झापा, पोखरासहित ललितपुर सिटी एफसी, एफसी चितवन, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची छन् । यसपटक एनएसएल पोखरा र काठमाडौंमा हुने बताइएको छ ।