काठमाडौं (हाम्रो खेलकुद)– न्यूरोड टिम (एनआरटी) का कप्तान दर्शन गुरुङ अधिकतम मुल्यमा बुटवल लुम्बिनी एफसीमा पुगेका छन् । एनएसएलका लागि शुक्रबार भएको अक्सनमा १० मध्ये ६ क्लबले उनलाई खरिद गर्न चाहेपछि गोलाप्रथामा उनी बुटवलमा पुगेका हुन् ।

एनएसएलको पहिलो संस्करणमा उनी धनगढी एफसीमा आबद्ध भएका थिए । हालै सम्पन्न सहिद स्मारक ए डिभिजन लिगमा उनको कप्तानीमा न्यूरोड तेस्रो भएको थियो । ए क्याटागोरीका खेलाडीको न्यूनत्तम मुल्य १ ला ५० हजार र अधिकतम मुल्य ३ लाख ५० हजार रुपैयाँ रहेको छ । घरेलु फुटबलका केहि चर्चित अनुहार भने अनसोल्ड भएका छन् । पुलिसका सुमन लामा, आर्मीका भरत खवास, थ्री स्टारका विक्रम लामा, मछिन्द्रका अभिषेक रिजाल जस्ता खेलाडी यसपटक अनसोल्ड भएका छन् ।

नेपाल स्पोर्टस् एण्ड इभेन्ट म्यानेजमेन्ट (एनएसइएम)को आयोजनामा चैत २६ गतेबाट हुने एनएसएलको दोस्रो संस्करणमा ३ नयाँ टोली थपेपछि कुल १० टोलीबीच प्रतिस्पर्धा हुनेछ । अक्सनमा ३ क्याटागोरीमा २ सय ४२ खेलाडी समावेश छन् । एनएसएलमा धनगढीसहित विराटनगर सिटी फुटबल क्लब, काठमाडौं रेजर्स, ललितपुर सिटी एफसी, एफसी चितवन, पोखरा थण्डर्स, बुटवल लुम्बिनी एफसी र तीन नयाँ टोली झापा एफसी, वीरगञ्ज युनाइटेड र स्पोर्टिङ इलाम डि मेची रहेका छन् । यसपटक एनएसएल पोखरा र काठमाडौंमा हुने भनिएको छ ।