सुनिल गाँउले, सिमरा

आयोजक नव जनजागृति युवा क्लब जगदम्बा १२औं जीतपुरसिमरा गोल्डकपको सेमिफाइनलमा प्रवेश गरेको छ । सिमरा रंगशालामा सोमबार भएको खेलमा सुदूपश्चिम ११ लाई १–० ले पराजित गर्दै आयोजक अन्तिम चारमा पुग्न सफल भएको हो ।

आयोजकको जितमा सुनिल खड्काले दोस्रो हाफमा गरेको गोल नै निर्णायक बन्यो । उनले ५०औं मिनेटमा गोल गरेका थिए । फ्रेण्ड्स क्लबमाथि ३–१ को जित निकाल्दै क्वाटरफाइनलको यात्रा तय सुदूपश्चिमले जनजागृतिविरुद्ध सुरुवातदेखी नै दवावमा देखिदा आकर्षक खेल पस्कन सकेन ।

डोना थापासहित ए डिभिजन क्लबका र स्थानिय खेलाडी सम्मिलित टिम लिएर मैदानमा उत्रिएको आयोजक सुरुवातदेखि नै पाहुना टोलीमाथि दवाव बढाउँदा गोलको लागि भने दोस्रो हाफ नै कुर्नुपरेको थियो । खेलको दोस्रो मिनेटमै विनोद केसीले डिबक्स भित्र पाएको बललाई पोष्टको दिशा दिन नसक्दा सुदूर अग्रता लिनबाट चुक्यो ।

१०औं मिनेटमा सुनिल खड्काको प्रहार क्रसबार नजिकैबाट बाहिरियो । १३औं मिनेटमा डोना थापाको पासमा सुनिल खड्का चुके । २७औं मिनेटमा डोनाकै क्रसमा मोहित गुरुङ गोल गर्न चुके । झन्डै पाँच हजार घरेलु दर्शकको समर्थन पाएको आयोजकविरुद्ध सुदूपश्चिमका पासाङ लामाले ३४औं मिनेटमा राम्रो अवसर बनाएपनि गोलरक्षक सन्तोष महतले नियन्त्रणमा लिए ।

दोस्रो हाफको सुरुवातमै सुनिल खड्काको गोलले अग्रता लिएपछि जनजागृति उत्साहित देखिएपनि थप गोल गर्न भने सकेनन् । अफ्रिकी मुलका दुई खेलाडीले सम्हालेको रक्षापंक्तीको घेरा तोड्न सुदूरपश्चिम पूर्णरुपमा असफल देखियो । अधिकांश समय बल आफ्नो नियन्त्रणमा राखेपनि जनजागृतिका हेमन्त थापा मगर, सुनिल खड्का, मोहित गुरुङले थुप्रै अवसर चुकाए ।

८३औ मिनेटमा डोनाको प्रहारलाई सुदूरपश्चिमका गोलरक्षक आकाश बुढाले बचाए । खेलमा डोना थापाले गरेको दुई वटा गोलले मान्यता पाएन । पहिलो हाफ र दोस्रो हाफमा उनले गोल गरेपनि रेफ्री नविन्द्र महर्जनले अफ घोषित गरेका थिए । सुनिल खेलको म्यान अफ दि म्याच घोषित भए । उनले नगद पाँच हजार प्राप्त गरे ।

प्रतियोगिता अन्तर्गत मंगलवार साविक बिजेता संकटा क्लब र बाग्मती युवा क्लब सर्लाहीबीच खेल हुनेछ ।