एजेन्सी – फिफा विश्वकप कतार २०२२ अन्तर्गत दक्षिण अमेरिकी छनोटको आफ्नो अन्तिम खेलमा जित निकालेपनि कोलम्विया विश्वकप छनोटबाटै बाहिरिएको छ । छनोटको अन्तिम खेलमा भेनेजुएलालाई १–० ले हराएपनि कोलम्विया विश्वकपमा छनोट हुन नसकेको हो ।

कोलम्वियालाई विश्वकपमा छनोट हुनको लागि आफुले सफलता हात पार्ने र पेरुले हार भोग्नुपर्ने समिकरण थियो । तर, आफुले सफलता हात पारेपनि पेरुले पनि जित निकालेपछि कोलम्विया बाहिरिन पुगेको हो । कोलम्वियाले यसअघिको दुई संस्करणको विश्वकप खेल्दा त्यसअघिको तीन संस्करणमा पनि छनोट हुन सकेको थिएन ।

बुधबार बिहान भएको खेलमा कोलम्वियाको जितमा हामेस रोड्रिग्वेजले पहिलो हाफमा गरेको गोल निर्णायक बन्यो । उनले पहिलो हाफको इन्ज्युरी समयको थप गरिएको चौथो मिनेटमा पेनाल्टीमार्फत गोल गर्न सफल भएको थियो ।

जितपछि कोलम्विया छनोटमा १८ खेलबाट २३ अंक जोडेर छैटौं स्थानमा रह्यो । कोलम्वियार्ला पछि पारेको पेरुले २४ अंक बटुल्यो । पराजित भेनेजुएला १० अंक जोडेर पुछारमा रह्यो ।

दक्षिण अमेरिकी छनोटकै अर्काे खेलमा पेरुले पाराग्वेमाथि २–० को जित निकाल्दै विश्वकपमा छनोट हुने सम्भावना जीवितै राखेको छ । पेरुको जितमा जियानलुका लापाडुला र योसिमार योटनले गोल गरे । दुवै गोल पहिलो हाफमा भएको थियो । पेरुले अब विश्वकपमा स्थान बनाउन प्ले अफमा एसियाली अष्ट्रेलियासँग खेल्नुपर्नेछ ।

छनोटमा पेरुले १८ खेलबाट २४ अंक बटुल्यो । पराजित पाराग्वेले १६ अंक जोड्यो । यस्तै यसपटकको विश्वकपमा चिली पनि देखिने छैन । दक्षिण अमेरिकी छनोटमा चिली सातौं स्थानमा रह्यो ।

दक्षिण अमेरिकाबाट छनोटमा शीर्ष चारमा रहने टोलीले विश्वकपमा सिधै छनोट हुने प्रावधान छ । पाँचौ हुने टोलीले प्ले अफ खेल्नुपर्नेछ । दक्षिण अमेरिकाबाट ब्राजिल, अर्जेन्टिना उरुग्वे र इक्वेडरले सिधै विश्वकपमा स्थान बनाउँदा पेरुले प्ले अफ खेल्नुपर्नेछ ।