चितवन (हाम्रो खेलकुद) – विराटनगर उपमहानगरपालिका मोरङ र विभागीय नेपाल पुलिस क्लबले राष्ट्रिय महिला लिगमा सहज जित निकालेको छ ।

चितवनको भरतपुरमा आइतबार भएको खेलमा विराटनगरले ललितपुर महानगरपालिकामाथि ५–१ को फराकिलो जित निकालेको हो । विराटनगरको जितमा इमा राई, मनिषा थापामगर, सदिपा भोलान, अस्मिता चौधरी र मिना खातुनले गोल गरिन् । ललितपुरकी सिर्जना सिंहले एक गोल फर्काइन् ।

खेलको आठौं मिनेटमा इमा राईको गोलबाट विराटनगरले सुरुवाती अग्रता लिएको थियो । ३५औं मिनेटमा मनिषा थापामगरले गोल गर्दै विराटनगरको अग्रता दोब्बर पारिन् । ४७औं मिनेटमा ललितपुरकी कप्तान सिर्जना सिंहले गोल गर्दै खेललाई २–१ को स्थितिमा ल्याएपनि त्यसपछि ललितपुरले लय गुमाउन पुग्यो ।

५६औं मिनेटमा सदिपा भोलानले गोल गर्दै विराटनगरलाई ३–१ ले अघि बढाइन् । ७९औं मिनेटमा अस्मिता चौधरीले तथा ८७औं मिनेटमा मिना खातुनले गोल गर्दै विराटनरगलाई फराकिलो जित दिलाइन् ।

यो जितसँगै विराटनगर चार खेलबाट ७ अंक जोडेर चौथो स्थानमा रहेको छ । ललितपुर ४ खेलबाट ३ अंक जोडेर छैटौं स्थानमा रहेको छ ।

लिगकै अर्काे खेलमा विभागीय नेपाल पुलिस क्लबले वालिङ नगरपालिका स्याङ्जालाई ३–१ ले पराजित गरेको छ । पुलिसको जितमा निर्मला विकेले दुई तथा अमृता जैशीले एक गोल गरिन् । वालिङकी सुष्मा जिटीले एक गोल फर्काइन् ।

खेलको दोस्रो मिनेटमा निर्मलाको गा्लबाट पुलिसले सुरुवाती अग्रता बनायो । ३३औं मिनेटमा निर्मलाकै गोलमा पुलिसले पहिलो हाफमा २–० को अग्रता लिन सफल भयो । ६७औं मिनेटमा सुष्मा जिटीले गोल गर्दै खेललाई २–१ को अवस्थामा ल्याएपनि त्यसपछि ८३औं मिनेटमा अमृता जैशीले गोल गर्दै पुलिसको जित पक्का गरिन् ।

यो जितसँगै पुलिस ४ खेलबाट ९ अंक जोडेर तेस्रो स्थानमा रहेको छ । समान ९ अंक नै रहेपनि धनगढी गोलअन्तरमा दोस्रो स्थानमा रहेको छ । शीर्षस्थानको एपिएफको १२ अंक छ । पराजित वालिङ अंकविहीन हुँदै पुछारमा छ ।