काठमाडौं (हाम्रो खेलकुद) – वीरगन्ज युनाइटेडले सहिद स्मारक ‘बी’ डिभिजन लिगमा झम्सिखेल युथ क्लबलाई पराजित गरेको छ । वीरगन्जले झम्सिखेललाई २–१ ले परासजत गरेको हो ।

सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा वीरगन्जको जितमा विवेक चौधरी र कृपाकान्त महतो थारुले गोल गरे । झम्सिखेलका सन्जय रम्तेलले एक गोल फर्काए ।

प्रतिस्पर्धात्मक बनेको खेलको ४३औं मिनेटमा विवेक चौधरीले गोल गर्दै वीरगन्जलाई १–० को अग्रता दिलाए । ७६औं मिनेटमा सन्जय रम्तेलले गोल गर्दै खेललाई १–१ गोलको बराबरीमा ल्याए । इन्ज्युरी समयको थप गरिएको पाँचौ मिनेटमा कृपाकान्त महतो थारुले गोल गर्दै वीरगन्जको जित पक्का गरे ।

यो जितसँगै वीरगन्जको १२ खेलबाट १५ अंक पुगेको छ । वीरगन्जसँगको हारसँगै झम्सिखेललाई रेलिगेसन दवाव बढेको छ । अब झम्सिखेललाई रेलिगेसन बच्न आफ्नो अन्तिम खेलमा जितले मात्रै पुग्दैन । सामाजिक र ब्वाइज युनियनले अंक गुमाउनुपर्नेछ ।

नयाँवस्ती युथ क्लब र टुसाल युथ क्लबले १–१ गोलको बराबरी खेल्दै अंक बाँडेका छन् । टुसालका सुनिल तामाङले गोल गर्दा नयाँवस्तीका विवेक गुरुङले बराबरी गोल फर्र्काए । ८८औं मिनेटमा सुनिल तामाङको गोलबाट टुसालले अग्रता बनाएको थियो । तर,इन्ज्युरी समयको थप गरिएको पहिलो मिनेटमा विवेक गुरुङले गोल गर्दै खेललाई १–१ गोलको बराबरीमा ल्याए ।

बराबरीसँगै नयाँवस्तीको ११ खेलबाट १५ अंक पुगेको छ । टुसालको ११ खेलबाट १४ अंक छ ।