झापा-११ शरणामती गोल्डकपको सेमिफाइनलमा

झापा (हाम्रो खेलकुद) – झापा ११ प्रथम अन्तर्राष्ट्रिय आमन्त्रण फुटबल प्रतियोगिता शरणामती गोल्ड कपको सेमिफाइनलमा पुगेको छ । झापाको शरणमती जारी प्रतियोगितामा मंगलबार मोरङ फुटबल क्लबलाई २–१ ले हराउँदै झापाले अन्तिम चारको यात्रा तय गरेको थियो । झापाका लागि योगेश गुरुङ र खमिर गिल्सा कन्दङ्वाले गोल गरे । मोरङका लागि रजिन धिमालले गोल फर्काए ।

स्थानिय जनता माविको मैदानमा भएको खेलमा २२ औं मिनेटमा योगेशको गोलबाट झापाले अग्रता लिएको थियो । उनले झन्डै २० यार्डबाट गरेको प्रहारलाई रोक्न गोलकिपर पुरन चेम्जोङ असफल भए । खमिरले दोस्रो हाफको १० औं मिनेटमा गोल गरे । उनले फ्रिकिकमा गोल गरेका थिए । मोरङका विक्रम लिम्बुले विशाल राईलाई फाउल हानेपछि झापाले फ्रिकिक पाएको थियो । मोरङका रजिनले इन्जुरी समयमा गोल गरेपनि नतिजामा फरक परेन । झापाका योगेश खेलको म्यान अफ दी म्याच घोषित भए । उनले २ हजार ५ सय रुपैयाँ प्राप्त गरे ।