एजेन्सी – इन्ज्युरी समयमा कप्तान करिम बेन्जेमाले गोल गरेपछि शीर्षस्थानमा रहेको रियल म्याड्रिडले स्पेनिस ला लिगामा सानदार पूनरागमन जित निकालेको छ ।

रियलले दुई गोलले पछि परेको अवस्थामा घरेलु टोली सेभियामाथि ३–२ को पूनरागमन जित निकालेको हो । रोमन सान्चेज पिजुआन सेभियामा आइतबार राति भएको खेलमा रियलको पूनरागमन जितमा रोड्रिगो, नाचो फर्नान्डेस र बेन्जेमाले गोल गरे । घरेलु टोली सेभियाका इभान राकिटिच र एरिक लमेलाले गोल गरे ।

२१औं मिनेटमा इभान राकिटिचले सिधै फ्रिकिकमा गोल गर्दै सेभियालाई सुरुवाती अग्रता दिलाए । २५औं मिनेटमा एरिक लमेलाले जेसस कोरोनाको पासमा गोल गरेपछि रियल पहिलो हाफमा २–० ले पछि परेको थियो ।

पहिलो हाफमा पछि परेको रियलले दोस्रो हाफमा सानदार पूनरागमन गर्दै जित निकाल्न सफल भयो । ५०औं मिनेटमा रोड्रिगोले ड्यानी कार्भाजलको पासमा गोल गर्दै रियललाई खेलमा फर्कने संकेत दिए । ८२औं मिनेटमा नाचो फर्नान्डेसले कार्भाजलकै पासमा गोल गर्दै खेललाई २–२ गोलको बराबरीमा ल्याए ।

बराबरीतर्फ धकेलिएको खेलको इन्ज्युरी समयको थप गरिएको दोस्रो मिनेटमा कप्तान करिम बेन्जेमाले गोल गर्दै रियललाई पूनरागमन जित दिलाए । उनले रोड्रिगोको पासमा गोल गर्न सफल भएका थिए । जारी सिजनको ला लिगामा बेन्जेमाको यो २५औं गोल हो । २८ खेल खेलेका उनले ११ असिस्ट समेत दिएका छन् ।

यो जितसँगै रियलले यो सिजनको ला लिगा जित्ने सम्भावना बलियो बनाएको छ । रियलले दोस्रो स्थानको टोलीलाई १५ अंकले पछि पारेको छ । रियलको ३२ खेलबाट ७५ अंक पुगेको छ । दुई खेल कम खेलेको बार्सिलोना र समान खेल खेलेको सेभिया र एट्लेटिको म्याड्रिडको समान ६० अंक छ । रियलसँग पराजित भएको सेभियाले दोस्रो स्थानमा उक्लने मौका गुमाएको छ ।