एजेन्सी – युइएफए च्याम्पियन्स लिगको सेमिफाइनलको पहिलो लेगमा आज (मंगलबार) राति इंग्लिस क्लब म्यानचेस्टर सिटीले घरेलु मैदानमा स्पेनिस क्लब रियल म्याड्रिडको आतिथ्यता गर्दैछ ।

खेल इतिहाद स्टेडियममा नेपाली समयअनुसार राति १२ः४५ बजे हुनेछ । घरेलु मैदानमा हुने खेलमा सिटी पाहुना टोली रियललाई हराउँदै फाइनल पुग्ने सम्भावना बलियो बनाउन चहान्छ ।

मुख्य डिफेन्डर रुबेन डियासले चोटबाट पूनरागमन गरेका छन् । काइल वाल्कर, एमेरिक लापोर्टा, नाथन एके, इल्केए गुन्डोगान, रोड्री, केभिन डि ब्रुयन,रियाद महारेज, बर्नाडो सिल्भा, फिल फोेडेन र गोलरक्षक इडर्सन मोराएस रहेका छन् । पोर्चुगिज डिफेन्डर जोआओ क्यान्सेलो प्रतिबन्धका कारण टोलीमा हुने छैनन् ।

रियल म्याड्रिडलाई चोटको समस्याले घेरेको छ । डेविड अलाबा तिघ्रामा समस्या देखिएपछि खेल्नेमा शंका छ । मिडफिल्डर क्यासेमिरो र डिफेन्डर फर्लान्ड मेन्डीले पनि खेल्नेमा शंका रहेको छ । लयमा रहेका करिम बेन्जेमा, भिनिसियस जुनियर, मार्काे एसेन्सियो, टोनी क्रुस, लुका मोड्रिच, इडुआर्डाे कामाभिंगा, इडर मिलिसाओ र गोलरक्षक थिवाउट कोर्टुवा टोलीमा रहेका छन् ।

सिटीका प्रशिक्षक पेप गुआर्डीओला रियलविरुद्ध च्याम्पियन्स लिगको नकआउट चरणमा जितको ह्याट्रिक पूरा गर्ने लक्ष्यमा हुनेछन् । गुआर्डीओलाले यसअघि दुई पटक फरक टोली बार्सिलोना र म्यानचेस्टर सिटीबाट हराएका छन् ।

रियलले यसअघि म्यानचेस्टर सिटीको मैदानमा खेलेका तीन खेलमा जित्न सकेको छैन । यसक्रममा टोलीले २ बराबरी र १ हारको नतिजा निकालेको छ । आफ्नो मैदानमा रियलविरुद्ध अपराजित रहने क्रममा सिटीले २०१५–१६ को सेमिफाइनल पहिलो लेगमा गोलरहित बराबरी खेलेको थियो । त्यस्तै सन् २०१९–२० को राउन्ड अफ १६ को पहिलो लेगमा सिटीले २–१ को जित दर्ता गरेको थियो ।

रियलले इंग्ल्यान्डको टोलीविरुद्ध पछिल्लो ६ अवे खेलमा एक पटक मात्र जित हासिल गरेको छ । चेल्सीलाई क्वाटरफाइनलको पहिलो लेगमा पराजित गर्दै रियलले बलियो सुरुवात गरेको थियो । त्यसो त हालसम्म कुनैपनि टोलीले च्याम्पियन्स लिगको नकआउट चरणमा दुई इंग्लिस टोलीको घरेलु मैदानमा जित हासिल गरेको इतिहास छैन ।