एजेन्सी – इंग्लिस प्रिमियर लिग अन्तर्गत लन्डन क्लब चेल्सीले रेलिगेसन क्षेत्रमा रहेको एभर्टनसँग हार बेहोरेको छ । आइतबार नै भएको अर्को खेलमा टोटेनहम हट्सपरले भने लेस्टर सिटीलाई पराजित गर्यो ।

चेल्सीका पूर्व खेलाडी तथा पूर्व प्रशिक्षक फ्रान्क लाम्पार्डको टोली एभर्टनले चेल्सीलाई १-० ले पराजित गर्यो । घरेलु मैदान गुडिसन पार्कमा एभर्टनका लागि रिचार्लीसनले खेलको एकमात्र गोल गरे । उनले दोस्रो हाफको सुरुवातमा चेल्सीका सेजार एज्पिलीक्वेटाबाट बल खोस्दै गोलको अवसर सिर्जना गरेका थिए ।

यस जितले एभर्टनको रेलिगेसन टार्ने सम्भावनामा थप बल पुगेको छ । खेलअघि बर्नली र लिड्सभन्दा ५ अंकले पछि रहेको एभर्टन ६८ वर्षपछि घटुवा हुने संघारमा छ । टोलीले ३३ खेलमा ३२ अंक जोडेको छ । रेलिगेसन क्षेत्रको ठिक माथि रहेका बर्नली र लिड्सको समान ३४-३४ अंक रहेको छ । पराजित चेल्सी भने ३४ खेलमा ६६ अंक जोड्दै तेस्रो स्थानमा यथावत छ ।

यस्तै आइतबार नै अर्को खेलमा टोटेनहमले लेस्टरलाई घरेलु मैदानमा ३-१ ले पराजित गर्यो । टोटेनहमको जितमा ह्युङ मिन सनले २ तथा ह्यारी केनले एक गोल गरे । लेस्टरका केलेची इहेनाचोले सान्त्वना गोल फर्काए ।

टोटेनहमले ३४ खेलमा ६१ अंक जोड्दै शीर्ष ४ मा रहँदै च्याम्पियन्स लिग खेल्ने सम्भावना जीवित राखेको छ । टोटेनहम र आर्सनल दुवै लिगको चौथो स्थान पक्का गर्ने दौडमा छन् ।