एजेन्सी – म्यानचेस्टर सिटी र बोरुसिया डर्टमन्डका फरवार्ड इर्लिङ हालान्डबीच सम्झौता भएको बताइएको छ । पछिल्लो केहि साता यता प्रिमियर लिगको शीर्षस्थामा रहेको सिटीसँगै रियल म्याड्रिड र बायर्न म्युनिख हालान्डलाई भित्राउने दौडमा रहेका थिए ।

त्यो दौडमा सिटीले बाजी मारेको छ र अब हालान्डले आकाशे निलो जर्सी लगाउने भएका छन् । युरोपेली फुटबलमा निकै विश्वासीलो मानिने द एथलेटिकका अनुसार हालान्ड र सिटीबीच सम्झौता भइसकेको छ । त्यसको पुष्टी भने यसै साता हुने सम्भावना बलियो रहेको बताइएको छ ।

हालान्डको सिटी यात्रा

हुन त सिटी र हालान्डबीच सम्झौताको चर्चा भएको यो पहिलो पटक होइन । यी दुई पक्षबीच सम्झौता भएको अप्रिलमा नै समाचार सर्वजनिक भएको थियो । सिटी हालान्डका लागि डर्टमन्डले राखेको रिलिज क्लबको मुल्य तिर्न तयार रहेको बताइएको छ । रिलिज क्लज ७५ मिलियन युरोको रहेको उल्लेख गरिएको छ ।

सबै प्रक्रिया सोचे जसरी अघि बढेको अवस्थामा हालान्ड सिटीमा आबद्ध भएको औपचारिक घोषणा यसै साता गरिने बताइएको छ । त्यो सम्भव भएमा प्रि सिजनमा उनी टोलीसँगै हुनेछन् । नर्वेको ब्रेनी र माल्डेबाट उनले खेल जीवन अघि बढाएका थिए । त्यसपछि उनले झण्डै एक वर्ष रेड बुल साल्सबर्गमा बिताएका थिए ।

सन् २०२० को जनवरीमा डर्टमन्ड पुगेका उनले त्यहाँ ८८ खेलमा ८५ गोल गरिसकेका छन् । हालान्ड युरोपका ठूला क्लब रियल, बार्सिलोना, बार्यन, पेरिस सेन्ट जर्मेनको आँखामा पनि परेका थिए । यद्दपी त्यसमा पेप ग्वार्डिओलाको सिटीले बाजी मारेको छ । बायर्नका एक पदाधिकारीले आफ्नो क्लबले हालान्ड अनुबन्ध नगर्ने पक्का भएको बताइसकेका छन् ।