काठमाडौं (हाम्रो खेलकुद)– सिन्धुपाल्चोक जिल्ला फुटबल संघका अध्यक्ष वीरबहादुर खड्का पुनः अखिल नेपाल फुटबल संघ (एन्फा) को उपाध्यक्षमा मनोनित भएका छन् ।

रिक्त एक उपाध्यक्षमा एन्फा कार्यसमितिको बैठकले शुक्रबार उनलाई बहुमतका आधारमा मनोनित गरेको हो । कार्तिक ८ गतेको एन्फा अध्यक्ष निर्वाचनमा पराजित भएपछि कर्माछिरिङ शेर्पाको उपाध्यक्ष पद स्वतः गुमेको एन्फाको भनाई छ । सोही बैठकले कार्तिक ८ उपाध्यक्षमा निर्वाचित उपाध्यक्ष मणी कुँवरलाई वरिष्ठ उपाध्यक्षमा बहुमतका आधारमा मनोनयन गरेको छ । तर, एन्फा अर्का उपाध्यक्ष किशोर राई र सदस्य पंकज नेम्वाङले मनोनयका विषयमा नोट अफ डिसेन्ट लेखेका छन् । राई र नेम्वाङले कुँवर र खड्काको मनोनयन विधान विपरित भएको बताएका थिए । उनीहरुले शेर्पा एक कार्याकालका लागि उपाध्यक्ष भएकाले पदमा यथावत रहनु पर्ने माग राखेका थिए ।
गत बर्ष तीन उपाध्यक्ष शेर्पासहित राई, विजयनारायण मानन्धर र सदस्य नेम्बाङलाई बर्खास्त गर्दै त्यो ठाँउमा कुँवर, खड्का र सन्तोष बानियाँलाई उपाध्यक्ष र अरुणमान जोशीलाई सदस्यमा मनोनयन गरेको थियो । पूर्व अध्यक्ष गणेश थापाको नेतृत्वमा उनीहरु बर्खास्त गरेको थियो । पछि एएफसीले निर्वाचित पदाधिकारी र सदस्यलाई पूर्नवहाली गर्न निर्देशन दिएपछि तीन जना उपाध्यक्ष र सदस्यको पूर्नवहाली भएको थियो । त्यति बेला मनोनित कुँवर, खड्का र बानियाँले राजीनामा दिएका थिए ।