एजेन्सी – केलियन एमबाप्पेले आफ्नो भविष्यको बारेमा निर्णय गरिसकेको बताएका छन् । आइतबार भएको द फ्रेन्च प्रोफेसनल फुटबर्स युनियन (युएनएफपी) गालाका दौरान पेरिस सेन्ट जर्मेन (पिएसजी) का फरवार्डले आफ्नो भविष्यका बारेमा प्रष्ट पारेका हुन् ।

फ्रान्सेली फरवार्ड एमबाप्पेले निर्णय गरेको बताउँदै गर्दा उनी फ्रि ट्रान्सफरमा रियल म्याड्रिड जाने सम्भावना बलियो देखिएको छ । युरोपका संचार माध्यमका अनुसार गत साता रियल र उनीबीच सम्झौता भएको बताइएको छ । केहि महिना यताबाट नै उनी रियल जाने प्रसंग निकै चर्चामा थियो । उनले पिएसजीको नविकरण प्रस्तावलाई पटक पटक अस्वीकार गर्दै आएका थिए ।

एमबाप्पे आफैंले सहि समय आएपछि आफ्नो निर्णय घोषणा गर्ने बताए । ‘मैले निर्णय गरिसकेको छु । तर त्यो भन्ने यो सहि समय होइन । केहि समय प्रतीक्षा गरौँ,’ उनले भने । एमबाप्पेले सिजन सकिएलगत्तै फ्रान्सको राष्ट्रिय टोलीमा जानुअघि क्लब घोषणा गर्ने बुझिएको छ ।

रियलका अध्यक्ष फ्लोरेन्टिो पेरेजको रणनीति सुरुवातबाटै प्रष्ट थियो । उनले एमबाप्पेको सम्झौता पिएसजीमा रहँदा सम्म खासै खुलेर बोलेनन् । एमबाप्पे आफै भने रियल आउन चाहेको पेरेजलाई थाहा थियो नै । उनले सोझै एमबाप्पेसँग सम्पर्क पनि राखेनन् ।

महत्त्वपूर्ण दुई दिन

गत साता एमबाप्पेले म्याड्रिडको भ्रमण गरेका थिए । सोमबार र मंगलबार भएको भ्रमणकै दौरान रियल र उनीबीच सम्झौता भएको विश्वास गरिएको छ । रियलका प्रबन्ध निर्देशक जोसे एन्जेल सान्चेजले एमबाप्पेसँग छलफल गरेका थिए ।

एमबाप्पे सुरुवातबाटै क्लबको प्राथमिकतामा रहेका थिए । रियल उनका लागि सबै खाले प्रयास गर्न तयार थियो । एमबाप्पे रियल जान तयार भइसकेका छन् । पिएसजीले अर्को कदम चाल्नु अघि नै रियल उनीसँग सम्झौता गर्न चाहन्थ्यो ।

रियलको पखाई

रियलले एमबाप्पेसँगको सम्झौताको विषय सार्वजनिक गर्न हतारिएको छैन । एमबाप्पेले नै पिएसजीको यात्रा अन्त्य भएको घोषणा गरुन् भन्ने रियलले चाहेको छ । रियलबाट खेल्ने आफ्नो सपना रहेको एमबाप्पेले पटक पटक बताइसकेका छन् ।

एमबाप्पेलेका लागि गत सिजन नै रियल २ सय मिलियन खर्च गर्न तयार भएको थियो । तर अहिले फ्रि ट्रान्सफरमा रियलले सम्झौता गर्न पाएको छ । पिएसजीले भने टोली निर्माणका लागि अबको सिजन लगानी गर्नुपर्ने भएको छ । एमबाप्पेको बर्हिगमनमा टोलीले कति पनि आम्दानी गर्ने छैन ।

५ वर्षे सम्झौता

एमबाप्पेले रियलसँग ५ वर्षको सम्झौता गर्ने सम्भावना छ । यसमा १ बिलियन युरोको रिलिज क्लज रहनेछ । रियलबाट उनले पारिश्रमिक भने पिएसजीले प्रस्ताव गरेको भन्दा कम पाउने अनुमान गरिएको छ ।