काठमाडौं (हाम्रो खेलकुद) – नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरी र राष्ट्रिय टोलीका खेलाडीबीचको विवादबारे तथ्य खोज्न गठन गरिएको समितिले बुधबार अखिल नेपाल फुटबल संघ (एन्फा) लाई प्रतिवेदन बुझाउने भएको छ ।

एन्फाको गत आइतबार बसेको आकस्मिक कार्यसमिति बैठकले भूतपूर्व राष्ट्रिय खेलाडी भिक्टर रानाको संयोजकत्वमा पूर्व खेलाडी विदुर विष्ट र नेपाली राष्ट्रिय तथा अन्तर्राष्ट्रिय खेलाडी संघका उपाध्यक्ष दीपक थापा सम्मिलित समितिलाई यस घटनाको तथ्य खोज्न जिम्मेवारी दिएको थियो । समितिलाई ७ दिनको समय दिइएको भएपनि निर्वाचन र सार्वजनिक विदाका कारण १० दिनपछि समितिले प्रतिवेदन बुझाउने भएको छ ।

समितिले घटनाको तथ्य खोजेर एन्फालाई सुझाव दिनेछ । एन्फा महसचिव इन्द्रमान तुलाधरका अनुसार समितिले प्रतिवेदन दिएपछि मात्र एन्फाले आफ्नो कदम चाल्नेछ । ‘समितिले आज प्रतिवेदन बुझाउने कुरा छ । अब उक्त प्रतिवेदनले के भन्छ । त्यसपछि मात्र के गर्न भन्न सकिन्छ,’ उनले भने, ‘समितिको सुझावले भनेको कार्य सचिवालयले गर्न सक्छ भने हामी गर्छौं नत्र कार्यसमितिमा पनि लग्नुपर्ने हुन सक्छ । पहिला समितिको प्रतिवेदन हेरेपछि मात्र त्यसबारे भन्न सकिन्छ ।’

समितिले पछिल्लो एक सातामा क्याम्प छोडेका १० खेलाडी, प्रशिक्षक अब्दुल्लाह अलमुताइरी लगायत अन्य घटनासँग सम्बन्धित व्यक्तिहरुसँग सोधपुछ गरेको थियो । एसियन कप छनोटको तयारीमा रहेको टोलीका १० सदस्यले आफूलाई क्याम्प छोड्न भनिएको बताएका छन् । एन्फाले भने हालसम्म यस विषयमा कुनै अधिकारिक प्रतिक्रिया दिएको छैन । टोलीका १० खेलाडी नहुँदा एन्फाले केहि खेलाडी थप गरेको छ, तर त्यसबारे पनि एन्फाले आधिकारिक सूचना राम्रोसँग प्रवाह गरेको छैन । प्रशिक्षक र खेलाडीले एन्फालाई बुझाएको पत्रबारे भने एन्फाले वेबसाइटमा समाचार नै बनाएको छ ।

यसबीचमा प्रशिक्षणमा रहेका खेलाडीसहित टोलीले नेपालमै रहेका अफ्रिकी खेलाडी सम्मिलित टोलीसँग भने मैत्रीपूर्ण खेल खेलेको छ । तीन खेलमा १ जित, १ बराबरी र १ हारको नतिजा निस्किएको छ । नेपाली टोलीले अफगानिस्तानसँग मैत्रीपूर्ण खेल खेल्ने भनेपनि हाल उक्त खेल हुने नहुने दुविधा रहेको छ ।

प्रशिक्षक अलमुताइरीले एन्फालाई लेखेको पत्र यसप्रकार छ :

खेलाडीहरुले पत्रकार सम्मेलनमा जारी गरिएको घटनाक्रम सहितको विज्ञप्ति :