पेरिस (एजेन्सी) – पोर्चुगल र रियल मड्रिडका फरवार्ड क्रिस्टियानो रोनाल्डोले यो बर्षको बालोन डि ओर अवार्ड जितेको छन् । रोनाल्डोले बालोन डि ओर अवार्ड जितेको यो चौथो पटक हो ।
CREDIT: L’EQUIPE
अर्जेन्टिना र बार्सिलोनाका फरवार्ड लियोनल मेस्सीले उक्त अवार्ड अहिले सम्म पाँच पटक जिति सकेका छन् । यसपटक अवार्ड जित्ने क्रममा रोनाल्डोले मेस्सी र एट्लेटिको मड्रिडका एन्टोनी ग्रिजम्यानलाई पछि पारेका थिए । रियलले गत बर्ष च्याम्पियन लिग उपाधि जित्दा रोनाल्डोले विजयी पेनाल्टी गोल गरेका थिए । म्यानचेस्टर युनाइटेडका पूर्व फरवार्ड रोनाल्डोको नेतृत्वमा यसै बर्ष पोर्चुगलले पहिलो पटक युरोपियन च्याम्पियनसिपको उपाधि जितेको थियो ।
यसअघि अवार्ड समारोह फिफाको मुख्यालय स्विट्रल्यान्डको जुरिचमा हुने गरेको थियो । तर, फ्रान्स फुटबल म्यागेजिनले प्रतिष्ठित अवार्डका लागि फिफासँगको सहकार्य तोडेको थियो । ६१ औं गोल्डेन बल अवार्डमा यसपटक पत्रकारहरुले मात्र निर्णय गरेका थिए । यसअघि पत्रकारसँगै फुटबलर र प्रशिक्षकबाट पनि भोट दिइने गरिन्थ्यो । फिफासँग सहकार्य तोडेपछि यसपटक अवार्ड फ्रान्सको पेरिसमा आयोजना भएको थियो ।
