म्यानचेस्टर (एजेन्सी)– पाब्लो जाबालेटा र डेभिड सिल्भाले गोल गरेपछि म्यानचेस्टर सिटीले घरेलु मैदानमा बिहीबार वाटफोर्डलाई २–० ले हराएको छ ।
पेप ग्वार्डिओलाको टोलीले पहिलो हाफमै अग्रता लिएको थियो । केभिन डी ब्रुनेको पासमा जाबालेटाले ३३ औं निेटमा गोल गरेका थिए । सिजनमा त्यो उनको पहिलो गोल हो । चोटग्रस्त लाके गुन्डोगान विना उत्रेको सिटीले खेलमा जुझारु प्रदर्शन गरेको थियो रहिम स्ट्रेलिङको प्रहार क्रसबारमा ठोक्किएको थियो ।
वाटफोर्डका इटिनी कापोउको प्रहारलाई क्लाडियो ब्राभोले रोकेका थिए । स्ट्रेलिङको पासमा खेल सकिन ४ मिनेट बाँकी रहँदा सिल्भाले गोलगरेका थिए । पछिल्लो खेलमा हार बेहोरेर पुनरागमन गरेको सिटी ३३ अंकसहित अंक तालिकाको चौथो स्थानमा छ ।
दोस्रो स्थान लिभरपुल र तेस्रो आर्सनलको समान ३४ तथा शीर्षस्थानको चेल्सीको ४० अंक छ । लिगका अन्य खेलमा चेल्सी,लिभरपुल , टोटेनह्याम, म्यानचेस्टर युनाइटेड जस्ता शीर्ष टोली पनि विजयी भएका छन् । त्यस्तै वेस्ट ह्याम युनाइटेड र वेस्ट ब्रुमविचले पनि जित निकालेका छन् भने स्टोक र साउथ ह्याम्टनले बराबरी खेलेका छन् ।
