काठमाडौं (हाम्रो खेलकुद)– उपाध्यक्षहरुको एजेण्डालाई केन्द्रिय कार्यसमितिको बैठकमा प्रस्तुत गर्न अखिल नेपाल फुटबल संघ (एन्फा) का अध्यक्ष पंकजविक्रम नेम्बाङ तयार भएका छन् । एन्फा नवनिर्वाचित कार्यसमितिको दोस्रो बैठक साउन २ गतेका लागि डाकिएको छ ।

अब विविध बाहेक १७ वटा एजेण्डामा छलफल हुने भएको छ । एन्फा उपाध्यक्ष दीर्घबहादुर (कुमार) केसीले बिहीबार ५ र त्यसअघि अर्को उपाध्यक्ष दीपक खतिवडाले एउटा एजेण्डा समेट्नमा माग गरेका थिए । उपाध्यक्ष खतिवडाले एन्फाको प्रमुख कार्यकारी अधिकृत र प्रवक्ता नियुक्तको एजेण्डा थप्न माग गरेका थिए ।

केसीले विशेष साधारण सभा, महिला लिगको दोस्रो चरण आयोजना, राष्ट्रिय लिग आयोजना, सहिद स्मारक ए, बी, सी डिभिजनको मिति निर्धारण र ललित स्मृति यू १८ प्रतियोगिता आयोजनाको एजेण्डा थप गर्न माग अनुरोध गरेका थिए ।

‘दुवै उपाध्यक्षले कार्यसमितिमा प्रस्तुत गर्न राख्नुभएको एजेण्डालाई समावेश गर्न अध्यक्ष ज्यू तयार हुनुभएको छ,’ एन्फा महासचिव किरण राईले भने,‘ त्यहि अनुसार एन्फा पदाधिकारी र सदस्यहरुलाई एजेण्डा थप गरिएको जानकारी पठाएका छौं ।’

एन्फा कार्यसमितिले पूर्णता भने पाउँन बाँकी हुँदै महत्वपूर्ण विषयमा छलफल र सम्भवत निर्णय हुने भएको छ । २१ मध्ये २ खुला सदस्यको पुनः निर्वाचन गर्न बाँकी रहेको छ । असार ६ गते भएको निर्वाचनबाट अध्यक्ष, एक वरिष्ठ उपाध्यक्ष, ४ उपाध्यक्ष, २ महिलासहित १३ सदस्य निर्वाचित भएका थिए । खुला सदस्यमा बाँकी २ सदस्यका लागि ४ जना मत बराबर भएपछि त्यसको निर्वाचन विशेष साधारण सभामा गरिने एन्फाले जनाएको थियो ।

एन्फाले कार्यसमिति बैठकका लागि भने महिला साफ च्याम्पियनसिपको आयोजना तथा टिम तयारीसहित विविध बाहेक ११ वटा एजेन्डा तय गरेको छ । जसमा पदपूर्ती समिति गठन, एनएसएल, सि डिभिजन छनोट, दैनिक फुटबल प्रशिक्षण सञ्चालन, यू २० र यू १७ टिम सहभागिता सम्बन्धमा एजेन्डा तय भएको छ ।

त्यस्तै विभिन्न पदाधिकारी नियुक्ती, आर्थिक सहयोग मापदण्ड निर्माण, राष्ट्रिय महिला/पुरुष सिनियर, युथ टिमलाई बुट ग्लोब्सका लागि रकम तोक्ने, डलर खाता खोल्ने, बस र फरर्चुनर गाडी तथा विविध एजेन्डामा छलफल गर्ने भन्दै एन्फाले कार्यसमिति पदाधिकारी र सदस्यहरुलाई असार २४ गते पत्राचार गरेको थियो ।