एजेन्सी – युरोपेली च्याम्पियन रियल म्याड्रिडका प्रशिक्षक कार्लो एन्चेलोटिले यसपटक ट्रान्सफर विन्डोमा क्लबले कुनै खेलाडी नथप्ने स्पष्ट पारेका छन् ।

रियलले गत सिजनको टोलीमा दुई खेलाडी अनुबन्ध गरिसकेको छ । चेल्सीबाट डिफेन्डर एन्टोनियो रुडीगर फ्री ट्रान्सफरमा रियल आएका छन् । त्यस्तै रियलले मोटो रकम खर्चेर मिडफिल्डर ओरेलिएन चुआमेनीलाई पनि अनुबन्ध गरेको छ । चुआमेनी फ्रान्सको मोनाकोबाट अनुबन्धित भएका हुन् ।

गत सिजनको टोलीबाट ४ खेलाडीले भने क्लब छाडेका छन् । लामो समयदेखि टोलीमा रहेका डिफेन्डर मार्सेलो, मिडफिल्डर इस्को तथा फरवार्डद्वय ग्यारेथ बेल र लुका जोभिचले म्याड्रिड छाडेका हुन् । बेल अमेरिकाको लास एन्जेलस फुटबल क्लब (एलएएफसी) तथा जोभिच इटालीको फिओरेन्टिनामा अनुबन्धित भइसकेका छन् ।

एन्चेलोटिले हाललाई क्लबमा नयाँ खेलाडी जरुरि नभएको बताए । ‘म खेलाडी अनुबन्धबारे केहि बोल्न चाहन्न । मैले भनिसकेको छु की अब त्यसमा हाम्रो ध्यान छैन । हामी कुनै खेलाडी भित्र्याउने छैनौं । अहिले हामीसँग भएको टोली नै पर्याप्त छ,’ उनले भने ।

इटालियन प्रशिक्षकले भर्खर टोलीमा आएका दुई खेलाडी अमेरिका टुरबाट टोलीमा भिज्ने अपेक्षा गरेका छन् । ‘दुवै खेलाडीले हाम्रो टोलीको स्तर बढाउने छन् । अहिले उनीहरुको पोजिसनमा बजारमा उपलब्ध उत्कृष्ट खेलाडी अरु छैन । रुडीगर राम्रा खेलाडी हुन् । चुआमेनी युवा छन् र निकै सम्भावना बोकेका खेलाडी हुन् । अमेरिका टुरमा टोलीसँग रहेर त्यसको फाइदा लिनुपर्छ,’ उनले थपे ।

एन्चेलोटिले बेन्जेमालाई विश्राम दिनुपर्दा हाजार्डलाई पनि फल्स ९ पोजिसनमा खेलाउन सकिने बताए । ‘हामीसँग उक्त पोजिसनमा विकल्प छ । बेन्जेमा निसंकोच पहिलो रोजाइमा छन् । तर विश्वकप पनि रहेकाले हामीले अरु विकल्प पनि हेर्नुपर्छ,’ उनले थपे, ‘इडेन पनि उक्त पोजिसनमा खेल्न सक्छन् । एसेन्सियोले पनि खेल्ने क्षमता राख्छन् ।’