एजेन्सी – प्रि–सिजनको मैत्रीपूर्ण खेलमा इंग्लिस क्लब आर्सनलले सफलता हात पार्दा अर्काे इंग्लिस क्लब चेल्सीले हार बेहोरेको छ ।

आर्सनलले ओर्लान्डो सिटीमाथि ३–१ को सहज जित निकालेको हो । आर्सनलको जितमा गाव्रियल मार्टिनेली, इडवार्ड एनकेटिया र रेइस नेल्सनले गोल गर्दा ओर्लान्डोका फकुन्डो टोरेसले एक गोल फर्काए ।

अमेरिकाको फ्लोरिडामा बिहीबार बिहान भएको खेलको पाँचौ मिनेटमा गाव्रियल मार्टिनेलीको गोलबाट आर्सनलले सुरुवाती अग्रता लिएको थियो । २९औं मिनेटमा फकुन्डो टोरेसले गोल गर्दै खेललाई १–१ गोलको बराबरीमा ल्याए ।

त्यसपछि आर्सनलले दोस्रो हाफमा दुई गोल थप्दै सहज जित निकाल्न सफल भयो । ६६औं इडवार्ड एनकेटियाले तथा ८०औं मिनेटमा रेइस नेल्सनले गोल गर्दै आर्सनललाई सहज जित दिलाए ।

प्रि–सिजनमा आर्सनलको यो लगातार तेस्रो जित हो । यसअघि आर्सनलले जर्मन क्लब नर्नवर्गलाई ५–३ ले तथा प्रिमियर लिग प्रतिद्धन्द्धी एभर्टनलाई २–० ले पराजित गरेको थियो ।

यता, अर्काे इंग्लिस क्लब चेल्सीले चार्लाेट एफसीसँग टाइब्रेकरमा ५–३ को हार बेहोरेको छ । निर्धारित समयको खेल १–१ गोलको बराबरीमा सकिएपछि खेलको निर्णय टाइब्रेकरबाट लिइदा घरेलु टोलीले बाजी मारेको हो ।

नर्थ कारोलिनामा बिहीबार बिहान भएको खेलको ३०औं मिनेटमा क्रिस्टियन पुलिसिसको गोलबाट चेल्सीले अग्रता लिएको थियो । तर, अन्तिम एक मिनेट सम्हालिन नसक्दा चेल्सीले गोल बेहोर्न पुगेको थियो ।

इन्ज्युरी समयको थप गरिएको तेस्रो मिनेटमा ड्यानियल रिओसले पेनाल्टीमा गोल गर्दै खेललाई १–१ गोलको बराबरीमा ल्याए ।

टाइब्रेकरमा चार्लाेटका ड्यानियल रिओस, क्रिस्टियन माकोअन, एन्टन वाल्केस, जोसेफ मोरा र कामिल जोजवियाकले गोल गरे । चेल्सीका काई हार्भाटज, बेन चिलवेल र रहिम स्टर्लिङले गोल गर्दा कोनोर गल्लाघेरले गोल गर्न सकेनन् ।