एजेन्सी – स्पेनिस क्लब रियल म्याड्रिडले ब्राजिली सेन्टर ब्याक एडर मिलिसाओको सम्झौता नविकरण गरेको छ । रियलले मिलिसाओको रिलिज क्लज ५ सय मिलियन युरो राख्दै सन् २०२८ सम्मको सम्झौता नविकरण गरेको हो ।

यसअघि रियलमा मिलिसाओको सम्झौता २०२५ सम्म रहेको थियो । रियलले प्रि–सिजनका लागि अमेरिका भ्रमणमा जानुअघि मिलिसाओसँगको सम्झौता नविकरण गरेपनि क्लबले झन्डै एक सातापछि सार्वजनिक गरेको हो । पोर्टाे बसाईको एक सिजनमै उनी रियलको नजरमा परेका हुन् ।

सन् २०१९ मा पोर्चुगिज क्लब पोर्टाेबाट ५० मिलियन युरोमा रियलमा आबद्ध भएका २४ वर्षीय मिलिसाओले आफ्नो प्रदर्शनलाई सुधार गर्दै पछिल्लो दुई सिजन रियलको प्रमुख खेलाडी बनेका छन् । उनको प्रदर्शनमा आएको सुधारसँगै रियलले उनलाई विश्वास गर्दै सम्झौता अवधि लम्ब्याउन सहमत भएको हो।

तत्कालिन कप्तान सर्जियो रामोस र राफायल भरान रहँदा उनले रियलमा सुरुवाती सिजनमा विरलै अवसर पाएका उनले यि दुई खेलाडीको अनुपस्थितिमा लगातार पहिलो रोजाईमा खेल्दै आँफुलाई क्लबको प्रमुख खेलाडीको रुपमा स्थापित गरिसकेका छन् ।

सम्झौताअनुसार उनको पारिश्रमिक स्वत बढेको छ । उनले प्रतिसिजन ३.५ मिलियन युरो प्लस बोनसबाट थप ७ मिलियन युरो पाउनेछन् । रियलमा तीन सिजन बिताउँदा २४ वर्षीय मिलिसाओले ९१ खेलमा ४ गोल गरेका छन् । २०१८ देखि ब्राजिलको टोलीमा रहेका मिलिसाओले २२ क्याप जित्दा एक अन्तर्राष्ट्रिय गोल गरेका छन् ।

ब्राजिली युवा स्टारद्धय भिनिसियस जुनियर र रोड्रिगोको सम्झौता अवधि लम्ब्याएको रियलले प्रि–सिजनको अमेरिका भ्रमणपछि आफ्नो योजनाबारे आधिकारिक रुपमा सार्वजनिक गर्ने जनाएको छ ।