एजेन्सी – प्रि सिजनको मैत्रीपूर्ण खेल अन्तर्गत क्याटलान क्लब बार्सिलोना र इटालियन क्लब युभेन्टस बराबरीमा रोकिएका छन् । बार्सिलोनाले खेलमा दुई पटक अग्रता लिएपनि युभेन्टस खेलमा फर्कंदै २-२ को बराबरी गर्न सफल रहयो ।

बार्सिलोनाका लागि दुवै गोल ओस्मान डेम्बेलेले गर्दा युभेन्टसको दुवै बराबरी गोल मोइस किनले फर्काए। खेलको ३४ औं मिनेटमा डेम्बेलेको गोलमा बार्सिलोनाले अग्रता लिएको थियो । उनले व्यक्तिगत प्रयासमा उत्कृष्ट गोल गर्दै सुरुवाती अग्रता दिलाएका थिए । राइट विंगबाट दुई डिफेन्डरको चुनौती चिर्दै उनले गरेको शक्तिशाली प्रहारलाई गोलरक्षक वोजचिएक सेचेज्नीले बचाउन सकेनन् ।

मोइस किनले ३९ औं मिनेटमा गोल गर्दै खेल बराबरीमा ल्याए । उनले जुआन कुआड्राडोको क्रसमा गोल गरेका थिए । तर डेम्बेलेले एक मिनेटमा नै खेल बराबरीमा ल्याए । उनले पुन: एकपटक राइट विंगमा एकल प्रयासमा सुन्दर गोल गरे । यसपटक चार डिफेन्डरको बीचबाट उनको प्रहार गोलमा परिणत भएको थियो ।

खेलको ५२ औं मिनेटमा किनले व्यक्तिगत दोस्रो गोल गर्दै खेल बराबरीमा ल्याए । त्यसपछि दुवै टोलीले खेलाडी परिवर्तन गर्दा गोल सम्भव भएन । बार्सिलोनाले खेलमा सुरुवात गरेका सबै ११ खेलाडी परिवर्तन गर्दा युभेन्टसले ९ खेलाडी परिवर्तन गरेको थियो । युभेन्टसबाट यसै सिजन भित्रिएका विंगर एन्जल डी मारियाले पनि खेलेका थिए ।