लन्डन (एजेन्सी)– याल्टन इब्राहिमोभिचले उच्च प्रदर्शनलाई निरन्तरता दिदा प्रिमियर लिगमा शनिबार म्यानचेस्टर युनाइटेड वेस्ट ब्रमुविचलाई २–० ले हराएको छ ।

युनाइटेडले सुरुमै खेलमा अग्रता लिएको थियो । पाँचौं मिनेटमा जेसी लिनगार्डको क्रसमा इब्राहिमोभिचले नजिकबाट हेडमार्फत गोल गरेका थिए । वायन रोनीले अन्तर दोब्बरको प्रयास गरेका थिए तर उनको प्रहार पोस्टमा लागेर फर्कियो । वेस्ट ब्रुमविचका सालोमोन रोन्डोनले पहिलो हाफमा हेडमार्फत गरेको प्रहार पोस्ट नजिकबाट बाहिरिदा बराबरीको मौका चुकेको थियो ।

इब्राहिमोभिचले ५६ औं मिनेटमा अर्को गोल थपे । रोनीले निकालेको पासमा इब्राहिमोभिचको प्रहार विपक्षी खेलाडीमा डिफ्लेक्ट हुँदै गोलम परिणत भएको थियो । प्रिमियर लिगमा त्यो उनको ११ औं गोल थियो । प्रिमियर लिगमा लगातार तीन जितपछि छैटौं स्थानमा यथावत रहेको युनाइटेडको ३० अंक पुगेको छ ।

समान ३० अंकको टोटेनह्यामले आइतबार बर्नलीसँग प्रतिस्पर्धा गर्नेछ । डिएगो कोस्टाको गोलमा क्रिस्टल प्यालेसलाई १–० ले हराउँदै शीर्षस्थानमा चेल्सी थप मजबुद बनेको छ ।

शनिबारकै अन्य खेलमा मिडल्सब्रोले स्वान्सी सिटीलाई ३–० ले, सन्डरल्यान्डल वार्टफोर्ड र वेस्ट ह्याम युनाइटेडले हल सिटीलाई समान १ –० ले हराए भने स्टोक सिटी र लेस्टर सिटीले २–२ को बराबरी खेले । चेल्सीको ४३ अंक पुगेको छ भने समान ३४ अंक भएका लिभरपुल दोस्रो र आर्सनल तेस्रो स्थानमा छ । चौथो स्थानको म्यानचेस्टर सिटीको ३३ अंक छ ।