काठमाडौं (हाम्रो खेलकुद)– रुस्लान थ्री स्टार क्लबले एएफसी कपको प्ले अफ खेल्न नपाउनुमा अखिल नेपाल फुटबल संघ (एन्फा) को लापरवाही भएकोमा एन्फाकै मानार्थ अध्यक्ष टासीले घले आलोचना गरेका छन् ।
सामसुङ मोबाइलको आधिकारिक विक्रेता आइएमएस समूहले एएएफसी सोलिडारिटी कप विजेता नेपाली टोलीलाई सम्मान गर्न सोमबार आयोजित कार्यक्रममा मानार्थ अध्यक्ष घलेले भने,‘थ्री स्टारले एएफसी कप प्ले अफ खेल्न नपाउनु दुःख लाग्दो कुरा हो । मानार्थ अध्यक्ष भएका नाताले त्यसमा मेरो पनि जिम्मेवारी रहन्छ । मेरो ठाँउबाट थ्री स्टारलाई न्याय दिलाउन प्रयास गर्नेछु ।’
उनले थ्री स्टारले क्षतिपूर्ति पाउनु पर्ने र दोषीमाथि कारवाही हुनुपर्नेमा जोड दिएका छन् । एन्फाको गल्तिका कारण प्ले अफ खेल्न नपाएको भन्दै थ्री स्टारले ६ करोड रुपैयाँ क्षेतिपूर्ति माग गर्दै दोषीमाथि कारवाहीको माग गरिसकेको छ । एन्फाले मंसिर २४ गते नै उपाध्यक्ष वीरबहादुर खड्काको संयोजकत्वमा छानविन समिति गठन गरेको थियो । केही दिन अघि सोही विषयमा छानविन गर्न राष्ट्रिय खेलकुद परिषद् (राखेप) ले सदस्य देवकुमार अधिकारीको संयोजकत्वमा ५ सदस्यीय समिति गठन गरेको थियो ।
एक अर्को प्रसंगमा घलेले फुटबल विकासका लागि एन्फा र ए डिभिजन क्लब मिलेर अघि बढ्नु आवशयक रहेको बताए । ‘अहिले १७ सदस्यीय एन्फाको कार्यसमितिमा एक जना पनि ए डिभिजन क्लबको प्रतिनिधि छैन ’ उनले भने, ‘तीनै ए डिभिजन क्लबले खेलाडीलाई अनुबन्धन गरेका छन्, व्यवसायिक फुटबललाई अघि बढाएका छन् । तर उनीहरुकै प्रतिनिधि नहुनु दुःखत हो । झगडा गरेर हैन, मिलेर फुटबल विकासमा लाग्नुपर्दछ । ’
आइएमएसका उपाध्यक्ष दिकेश मल्होत्रा र एन्फा मानार्थ अध्यक्ष घलेले खेलाडी, प्रशिक्षक, फिजियोलाई सामसुङको जे ५ मोबाई प्रदान गरेका थिए । टोलीका २३ खेलाडी, दुई प्रशिक्षक, व्यवस्थापक र फिजियोलाई मोबाइल दिइएको थियो । कात्तिकमा मलेसियाको कुचिङमा भएको प्रतियोगितामा मकाउलाई १–० ले हराउँदै नेपालले सोलिडारिटी कप जितेको थियो । नेपालले पहिलो पटक एसियाली फुटबल संघ (एएफसी) को आधिकारिक प्रतियोगिता जितेको त्यो नै पहिलो अवसर हो । टोलीका उपकप्तान विराज महर्जनले आइएसएमको सम्मानले खेलाडीको हौसला थप बढेको बताएका थिए ।
