एजेन्सी – इंग्लिस विंगर फरवार्ड रहिम स्टर्लिङको दुई गोलमा लन्डन क्लब चेल्सीले इंग्लिस प्रिमियर लिगमा लेस्टर सिटीलाई पराजित गरेको छ ।

घरेलु मैदानमा १० खेलाडीमा समेटिएको चेल्सीले लेस्टर सिटीलाई २–० ले पराजित गरेको हो । लेस्टरका हार्भे बार्नेसले एक गोल फर्काए । स्टामफोर्ड ब्रिजमा शनिबार राति भएको खेलको २८औं मिनेटमा घरेलु टोली चेल्सी १० खेलाडीमा समेटिन पुगेको थियो ।

पहिलो हाफमै ७ मिनेटको अन्तरमा कोनर गलाघेर दोहोरो पँहेलो कार्ड खाँदै मैदानबाट बाहिरिएपछि चेल्सी समस्यामा पर्न सक्ने आँकलन गरिएको थियो । तर दोस्रो हाफको शुरुमै रहिम स्टर्लिङले गोल गर्दै चेल्सीलाई सुरुवाती अग्रता दिलाए ।

रहिमले ४७औं मिनेटमा मार्क कुकुरेलाको पासमा गोल गर्न सफल भएका थिए । ६३औं मिनेटमा रिस जेम्सको पासमा रहिमले व्यक्तिगत र टोलीका लागि दोस्रो गोल गर्दै चेल्सीको अग्रता दोब्बर पार्दै टोलीलाई मजवुत स्थितिमा राखे ।

६६औं मिनेटमा हार्भे बार्नेसले जेमी भार्डीको पासमा गोल गर्दै लेस्टरलाई खेलमा फर्काउने संकेत दिएपनि त्यसपछि थप गोल निस्कन नसक्दा चेल्सी विजयी हुन सफल भयो ।

यस जितसँगै चेल्सी ४ खेलबाट ७ अंक जोडेर छैटौं स्थानमा रहेको छ । पराजित लेस्टर १ अंक जोडेर १९औं स्थानमा रहेको छ ।

अन्य नजिता
साउथह्याम्टनविरुद्ध म्यानचेस्टर युनाइटेड (०–१), ब्रेन्टफर्डविरुद्ध एभर्टन (१–१), ब्राइटनविरुद्ध लिड्स (१–०), लिभरपुलविरुद्ध बर्नमाउथ (९–०) र म्यानचेस्टर सिटीविरुद्ध क्रिस्टल प्यालेस (४–२)