काठमाडौं (हाम्रो खेलकुद) – छैटौं महिला साफ च्याम्पियनसिप मंगलबारदेखि दशरथ रंगशालामा सुरु हुँदैछ । साँझ ५:३० बजे हुने उद्घाटन खेलमा नेपालले भुटानको सामना गर्दैछ ।

प्रतियोगितामा हालसम्म कुनै जित दर्ता गर्न नसकेको भुटान नेपालविरुद्ध उत्रँदा कागजी रुपमा घरेलु टोली निकै बलियो मानिएको छ । पछिल्ला तीन प्रतियोगितामा एक आपसमा भिड्दा भुटानले नेपालविरुद्ध कुनै गोल गर्न सकेको छैन । नेपालले भने ३ खेलमा १९ गोल गरेको छ ।

सन् २०१९ मा विराटनगरमा भएको साफमा नेपालले भुटानलाई ३-० ले हराएको थियो । उक्त खेलमा मन्जली कुमारी योन्जन, सावित्रा भण्डारी र निरु थापाले गोल गरेका थिए । सावित्राको लागि भुटानविरुद्ध खेल सधैं विशेष रहने गर्छ । उनले सन् २०१४ को साफ्मा भुटानविरुद्ध खेल्दै डेब्यु गरेकी थिइन् । उक्त खेलमा नेपाल ८-० ले विजयी हुँदा उनले बेन्चबाट छिरेर अन्तिम गोल गरेकी थिइन् । सन् २०१६ मा नेपाल ८-० ले विजयी हुँदा सावित्रा एक्लैले ६ गोल गरेकी थिइन् ।

साफ च्याम्पियनसिपमा भुटानले हालसम्म समूह चरण पार गर्न सकेको छैन । हालसम्म १४ खेल खेल्दा टोलीले १३ हार र १ बराबरीको नतिजा निकालेको छ । भुटानले एकमात्र बराबरी सन् २०१० मा भएको पहिलो संस्करणमा श्रीलंकाविरुद्ध निकालेको थियो । आजको खेलमा नेपालविरुद्ध अंक खोस्न सफल भएमात्र पनि भुटान अर्को चरणमा पुग्ने सम्भावना हुनेछ । त्यसैले टोली रक्षात्मक रुपमा प्रस्तुत भएर नेपाललाई समस्या दिने प्रयासमा हुनेछ ।

साफ च्याम्पियनसिपमा दुई टोलीको एक आपसमा नतिजा :

सन् २०१० : दुई फरक समूह

सन् २०१२ : दुई फरक समूह

सन् २०१४ : नेपाल ८-० भुटान

सन् २०१६ : नेपाल ८-० भुटान

सन् २०१८ : नेपाल ३-० भुटान

खेलअघि के भन्छन् नेपाल र भुटान ?

नेपाली टोलीका मुख्य प्रशिक्षक कुमार थापाले बिगतलाई बिर्सेर राम्रो गर्ने लक्ष्य रहेको बताएका छन् । ‘पहिलेको नतिजा हेरेर अनुमान गर्न सकिदैन । च्याम्पियन को बन्छ भनेर हामी पनि अनुमान गर्न सक्दैनौं । आफुले दोस्रोपटक पाएको मौकालाई खेर जान दिने छैनौं,’ उनले थपे, ‘हामीले कसैलाई कमजोर आँकेका छैनौं । पहिला लिग चरणमा केन्द्रित रहन्छौं त्यसपछि नकआउटमा ध्यान दिनेछौँ ।’

रंगशालामा पहिलोपटक आधिकारिक च्याम्पियनसिप खेल्दा सबै खेलाडीको मानसिकतालाई सामान्य गराउने उनले थपे । गोलरक्षक तथा कप्तान एन्जिला तुम्बाप्पो सुब्बाले आफ्नो कप्तानीमा त्यो विश्वासलाई गुम्न नदिने बताइन् । उनले अन्तिमसम्म मैदानमा लड्ने र अहिले बोल्नु भन्दा मैदानमा देखाउने थपिन् ।

भुटानकी प्रशिक्षक क्युङ सुक होङले प्रतियोगिताका लागि राम्रो तयारी गरेर आएको बताइन् । टोलीकी कप्तान पेमा छोदेन छिरिङले घरेलु मैदानमा नेपालको सामना गर्न सहज नहुने बताइन् । प्रतियोगिताको पूर्व सन्ध्यामा आयोजित पत्रकार सम्मेलनमा उनले नेपाली समर्थकमाझ खेल्न मानसिक रुपमा पनि कठिन हुने अभिव्यक्ति दिइन् । ‘हाम्रो टोलीमा युवा खेलाडीको बाहुल्यता छ । नेपाल निकै बलियो टोली हो । घरेलु टोलीविरुद्ध खेल्न सहज हुने छैन ।’ उनले भनिन्, ‘घरेलु समर्थकको अगाडि खेल्नु मानसिक रुपमा पनि सहज हुँदैन ।’

‘हामी लामो समय देशबाहिर गएर खेल्न पाएका छैनौं । त्यसैले नेपालमा चाडै आएर मैत्रीपूर्ण खेल पनि खेलेका छौं । यहाँको वातावरणसँग भिजेका छौं ।’ उनले भनिन्, ‘घरेलु लिगको भरमा हामीले टोली निर्माण गरेका छौं । आशा छ राम्रो नतिजा आउनेछ ।’

प्रत्यक्ष प्रसारण :

एन्फाले प्रतियोगिताको मार्केटिङ र ब्रोडकाष्टिङ अधिकार भारतको १०० स्पोर्ट्सलाई विक्री गरेको थियो । १०० स्पोर्ट्सले नेपालमा एपी१ टेलिभिजनलाई प्रसारण अधिकार दिएको छ । एपी१ कै युट्युब च्यानलबाट नेपालभर खेल प्रत्यक्ष प्रसारण गरिनेछ ।

नेपाली टोलीबारे विस्तृत विवरण यहाँ : इतिहास रच्न आतुर नेपाल : टोलीभित्र अभावसँगै आन्तरिक प्रतिस्पर्धा