काठमाडौं (हाम्रो खेलकुद) – छैटौं महिला साफ च्याम्पियनसिप अन्तर्गत समूह ए को पहिलो खेलमा साविक विजेता भारतले विजयी सुरुवात गरेको छ । भारतले पाकिस्तानमाथि ३-० को जित दर्ता गर्दै ३ अंक जोडेको हो ।

खेलको सुरुवातमा पाकिस्तानले केही राम्रो मुभ सिर्जना गरेपनि पाकिस्तानी कप्तानले आत्मघाती गोल गरेपछि टोली दबाबमा देखियो । पहिलो गोलको केही मिनेटपछि नै दोस्रो गोल गरेपछि पाकिस्तानले रक्षात्मक रणनीति लिएको थियो । भारतले त्यसपछि निरन्तर आक्रमण गरेपनि गोल थप्न कठिन भयो । इन्ज्युरी समयमा भने भारतले अग्रता बढायो ।

दशरथ रंगशालामा खेलको चौथो मिनेटमा नै पाकिस्तानले अग्रता लिने सुवर्ण अवसर खेर फाल्यो । जुल्फिया नाजिरको पासमा नादिया खानले वन भर्सेस वनको अवस्थामा गोल गर्न सकिनन् । जुल्फियाले अफसाइड ट्रयाप बिट गर्दै दिएको पासमा नादियाले पेनाल्टी क्षेत्रको दायाँ भागबाट गरेको प्रहारले गोलरक्षकलाई पनि समस्या दिन सकेन ।

खेलको २० औं मिनेटमा भारतले अग्रता लियो । भारतकी सन्ध्या रंगनाथनले बायाँ विंगबाट गरेको क्रस गोलरक्षक सहिदा महापाराले बचाएकी थिइन् । तर रिबाउन्डमा आएको बल कप्तान मारिया खानलाई लाग्दै आफ्नै पोस्टमा छिरेको थियो ।

पहिलो गोल गरेको दुई मिनेट नबित्दै भारतले अग्रता दोब्बर पार्यो । दाङमेइ ग्रेसले पेनाल्टी क्षेत्र भित्रबाट गोल गर्दै २-० को अग्रता दिलाइन् । उनले अन्जु तामाङको चलाखीपूर्ण पासलाई नियन्त्रणमा लिँदै वन भर्सेस वनमा गोल गरेकी थिइन् ।

५९ औं मिनेटमा कप्तान मारियाको प्रहार भारतकी गोलरक्षक अदिति चौहानले सहजै बचाइन् । लगत्तै ६१ औं मिनेटमा जुल्फियाको क्रस सिधै पोस्टतर्फ गएपनि अदितिले दोस्रो प्रयासमा बचाइन् । ६५ औं मिनेटमा रन्जना चानुको क्रसमा पाकिस्तानको डिफेन्स लाइन र गोलरक्षक बिट भएपनि सौम्या गुगुलगोठले बल नियन्त्रणमा लिने क्रममा हातले छुँदा रेफ्रीले फल दिएकी थिइन् ।

७३ औं मिनेटमा भारतले अग्रता बढाउने अर्को अवसर गुमायो । ग्रेसको क्रसमा गोलरक्षक बिट भएपनि किरण पिस्दाले खाली पोस्टमा बललाई गोल गर्न सकिनन् । लगत्तै ऋतु रानीले झन्डै ३० यार्ड टाढाबाट गरेको प्रहार पोस्ट नजिकबाट बाहिरियो । ८० औं मिनेटमा किरणको पासमा अन्जुको प्रहारले पोस्टको दिशा लिन सकेन ।

इन्ज्युरी समयमा भारतले अर्को गोल थप्यो । रन्जना चानुको क्रसमा सौम्या गुगुलगोठले गोल गर्दै ३-० को जित पक्का गरिन् ।

आज हुने समूह ए को दोस्रो खेलमा बंगलादेशले माल्दिभ्सको सामना गर्नेछ । खेल साँझ ५:३० बजे दशरथ रंगशालामा हुनेछ ।