काठमाडौं (हाम्रो खेलकुद) – नेपाली महिला राष्ट्रिय फुटबल टोलीका प्रशिक्षक कुमार थापाले लगातार दोस्रो जित दर्ता गरेपछि आफ्नो रणनीतिमा कुनै परिवर्तन नगर्ने बताएका छन् ।

सोमबार दशरथ रंगशालामा भएको समूह चरणको अन्तिम खेलमा श्रीलंकालाई ६-० ले पराजित गर्दै नेपाल समूह विजेता बन्यो । पहिलो खेलमा नेपालले भुटानलाई ४-० ले पराजित गरेको थियो । पहिलो खेलमा डेंगीका कारण विंगर मन्जली कुमारी योन्जनलाई गुमाएको नेपालले दोस्रो खेलमा सावित्रा भण्डारीलाई डेंगीकै कारण प्रयोग गर्न सकेन । दुवै खेलाडी सेमिफाइनलमा उपलब्ध हुनेबारे केही भन्न सकिने अवस्था छैन ‌।

प्रशिक्षक थापाले टोलीमा महत्त्वपूर्ण भूमिका रहेका दुवै खेलाडी अनुपस्थित रहेपनि आफ्नो रणनीति परिवर्तन नगर्ने बताए । ‘हामी आफ्नो रणनीति बदल्ने छैनौं । दुई खेलाडी अनुपस्थित हुन्छन् भन्दिन, हामीसँग अझै ३ दिन छ । उनीहरुको अवस्था ठिक हुन्छ भन्ने आशा गरौं,’ उनले भने ।

श्रीलंकाविरुद्ध प्रशिक्षक थापाले पछिल्लो खेलबाट आक्रमणमा दुई खेलाडी परिवर्तन गरेका थिए । रेखा पौडेल र रश्मीकुमारी घिसिङले सुरुवात गर्ने अवसर पाएपनि प्रशिक्षक थापा प्रदर्शनबाट सन्तुष्ट देखिएनन् । ‘ खेलाडीले एकदम गोल गर्न हतार‌ गरे । हामीले आफ्नो शैली अनुसार खेल्न सकेनौं । म खुसी छैन । आज त श्रीलंकाविरुद्ध कठिन थिएन तर अन्य टोलीविरुद्ध गाह्रो हुन्छ,’ उनले भने ।

प्रशिक्षक थापाले भारत र बंगलादेश दुवै बलियो टोली भएकाले जुनसुकै टोलीविरुद्ध पनि नेपाल तयार रहेको बताए । ‘भारत अनुभवी टोली हो । बंगलादेशको युवा टोलीले प्राविधिक फुटबल खेल्छ । हामी दुवै टोलीको सामना गर्न तयार छौं । आफ्नो रणनीति र शैलीमा बसेर खेल्नेछौं,’ थापाले भने ।

राष्ट्रिय टोलीका लागि पहिलो प्रतियोगिता खेलिरहेका अमिशा कार्की र दीपा शाहि दुवैको प्रदर्शनमा प्रशिक्षक थापाले खुसी व्यक्त गरे । ‘ दुवै राम्रा खेलाडी हुन् ‌। अमिशाले दोस्रो हाफमा आएर दुई गोल गरिन् । दीपाले पनि राम्रो खेलिरहेकी छिन्,’ उनले भने, ‘ मैले डेब्यु दिएका खेलाडी राम्रो खेल्दा खुसी लाग्छ । उनीहरु सक्षम भएर नै खेल्न पाएका हुन् । राम्रो खेल्दा खुसी लाग्छ ।’