काठमाडौं (हाम्रो खेलकुद) – दशरथ रंगशालामा जारी महिला साफ च्याम्पियसिपको समूह चरणको अन्तिम खेल भारत र बंगलादेशबीच मंगलबार साँझ साढे ५ः०० मा सुरु हुनेछ । सेमिफाइनल पुगिसकेका दुई टोलीबीचको प्रतिस्पर्धाले समूह विजेता र उपविजेताको टुंगो लगाउने छ ।

भारत र बंगलादेशबीच प्रतिस्पर्धा भइराख्दा सेमिफाइनलमा कुन टोलीसँग प्रतिस्पर्धा गर्नुपर्ने हो भन्नेमा नेपाली टोलीको नजर रहनेछ । सबै संस्करणको च्याम्पियन भारत र एक पटक फाइनल खेलेको बंगलादेश दुवैले पछिल्ला दुई खेलमा गोलको वर्षा नै गरेका छन् । सेमिफाइनल अघि यी दुई टोलीबीच हुने खेल प्रतिस्पर्धात्मक हुने अपेक्षा गरिएको छ ।

भारतले पाकिस्तानलाई र बंगलादेशले माल्दिभ्सलाई समान ३–० को अन्तरमा हराउँदै च्याम्पियनसिपको यात्रा सुरु गरेका थिए । फरक दुई टोलीले दोस्रो खेलको जितमा गरेको गोलअन्तर मात्रै छ । दोस्रो खेलमा बंगलादेशले पाकिस्तानलाई ६–० ले तथा भारतले माल्दिभ्सलाई ९–० ले हराएको थियो । समान ६ अंक जोडेका भारत र बंगलादेश शीर्ष दुई स्थानमा रहँदा यी दुई टोलीबीच गोलअन्तर मात्र फरक रहेको छ ।

दुवैको लक्ष्य समूह विजेता बन्नुहुनेछ । त्यसको मुख्य कारण सेमिफाइनलमा नेपाली टोली चुनौतीसँग प्रतिस्पर्धा गर्नु नपरोस् भन्ने हो । समूह एको उपविजेता भुटानसँग सेमिफाइनल खेल्नु भारत र बंगलादेश दुवैका लागि नेपालसँग भन्दा तुलानात्मक रुपमा सहज हुनेछ । नेपालले पहिलो खेलमा ४–० ले हराएको श्रीलंकालाई ५–० ले हराउँदै भुटान पहिलो पटक सेमिफाइनल पुगेको थियो ।

इतिहास हेर्ने हो भने भारत बंगलादेश मात्र होइन दक्षिण एसियाका सबै टोलीमाथि हाबी रहँदै आएको छ । बंगलादेशले अहिले सम्म भारतलाई साफ च्याम्पियनसिपमा हराउन सकेको छैन । एकै समूहमा रहँदा सन् २०१६ मा गोलरहित बराबरीमा रोक्नुनै भारतविरुद्ध बंगलादेशको अहिले सम्मको सफल नतिजा हो । त्यसबाहेक ५ भेटमा पाँचै पटक भारतसँग बंगलादेश पराजित भएको छ ।

यद्दपी यसपटक बंगलादेश अझै शसक्त ढंगले प्रस्तुत भएको छ । बंगलादेशको सुन्दर खेलले सबैलाई प्रभावित पारेको छ । त्यसअर्थ भारत पनि पक्कै बंगलादेशसँग चनाखो रहनेछ । मंगलबारको खेल बराबरीमा टुंगिए भारत समूह विजेता बन्नेछ भने बंगलादेश उपविजेता बन्ने छ । जितले मात्र बंगलादेश समूह विजेता बन्नेछ ।

भारत र बंगलादेविरुद्ध नेपालको प्रदर्शन

साफ च्याम्पियनसिपमा नेपालले भारतलाई हराउन सकेको छैन । ४ पटक फाइनल र एक पटक सेमिफाइनल सबैमा नेपाल भारतसँग नै पराजित भएको थियो । अर्कोतर्फ बंगलादेशले हराउन नसकेको दुई टोली भारत र नेपाल नै हुन् । त्यसअर्थ नेपालका लागि पनि बंगलादेश भारतभन्दा सहज प्रतिद्वन्द्वि हो ।

बंगलादेशसँग यसअघि का ३ भेटमा नेपालले सबै खेल जितेको छ । नेपालले बंगलादेशलाई सन् २०१० को पहिलो संस्करणमा ३–० र २०१४ को तेस्रो संस्करणमा १–० ले हराउँदै फाइनलको यात्रा तय गरेको थियो । २०१९ को विराटनगरमा भएको पाँचौं संस्करणको एक समूहमा रहँदा नेपालले बंगलादेशलाई ३–० ले हराएको थियो । २०१६ को संस्करणमा जहाँ नेपाल फाइनल पुग्न असफल भएको थियो भने बंगलादेशले त्यहि एक संस्करणमा भारतविरुद्ध फाइनल खेलेको थियो ।

भारतसँग साफ च्याम्पियनसिपमा नेपाल सधै पराजित भएको छ । साफको फाइनलमा पहिलो संस्करणमा १–०, दोस्रोमा ३–१, तेस्रोमा ६–० ले भारतसँग पराजित भएको नेपालले २०१६ को सेमिफाइनल नतिजा ३–१ ले सुम्पेको थियो । पाँचौं संस्करणको फाइन्लमा भारतसँग नेपाल ३–० ले पराजित भएको थियो ।

साफ च्याम्पियनसिपमा भारत र बंगलादेशबीचको नतिजा

वर्ष भारत बंगलादेश खेल
२०१० ६ ० समूह चरण
२०१२ ३ ० समूह चरण
२०१४ ५ १ समूह चरण
२०१६ ० ० समूह चरण
२०१६ ३ १ फाइनल
२०१९ ४ ० सेमिफाइनल

साफ च्याम्पियनसिपमा नेपाल र बंगलादेशबीचको नतिजा

वर्ष नेपाल बंगलादेश खेल
२०१० ३ ० सेमिफाइनल
२०१४ १ ० सेमिफाइनल
२०१९ ३ ० समूह चरण

साफ च्याम्पियनसिपमा नेपाल र भारतबीचको नतिजा

वर्ष नेपाल भारत खेल
२०१० ० १ फाइनल
२०१२ १ ३ फाइनल
२०१४ ० ६ फाइनल
२०१६ १ ३ सेमिफाइनल
२०१९ ० ३ फाइनल