काठमाडौं (हाम्रो खेलकुद) – महिला साफ च्याम्पियनसिपको साविक विजेता भारतले प्रतियोगिताको इतिहासमै पहिलो हार बेहोरेको छ । नेपालमा जारी छैटौं संस्करण अन्तर्गत समूह चरणको अन्तिम खेलमा बंगलादेशले भारतलाई ३-० ले पराजित गरेको हो ।

एकपक्षीय खेलमा बंगलादेशले भारतविरुद्ध ३-० को जित दर्ता गरेको हो । खेल अवधिभर नै भारतको डिफेन्सलाई समस्या दिएको बंगलादेशले पहिलो हाफमा २ र दोस्रो हाफमा १ गोल गर्यो । बंगलादेशका लागि दुवै फरवार्डले गोल गर्ने क्रममा मोसमात सिराज जाहान सोप्नाले दुई तथा कृष्णारानी सरकारले एक गोल गरे ।

साफको इतिहासमा भारतको यो पहिलो हार पनि हो । यसअघि साफमा २५ खेल खेल्दा भारतले २४ जित र १ बराबरीको नतिजा निकालेको थियो । सन् २०१६ मा पनि बंगलादेशले समूह चरणको अन्तिम खेलमा भारतलाई गोलरहित बराबरीमा रोकेको थियो । उक्त बराबरीकै कारण नेपाल र भारत सेमिफाइनलमा भिडेका थिए ।

यस जितसँगै बंगलादेश समूह विजेताको रुपमा सेमिफाइनलमा प्रवेश गरेको छ । भारत भने समूह उपविजेता बन्दै सेमिफाइनलमा नेपालसँग खेल्नेछ । बंगलादेशले ३ खेलमा ३ जितका साथ ९ अंक जोड्दा भारत ६ अंकमा सिमित भयो । पाकिस्तानले ३ अंक तथा माल्दिभ्स अंकविहिन रहयो ।

पहिलो हाफको सुरुवातदेखि नै आक्रामक देखिएको बंगलादेशले पटक पटक भारतको डिफेन्सलाई समस्या दिएको छ । भारतले भने तुलनात्मक रुपमा कम बल पोसेसन पाएको छ । काउन्टर अट्याकमा पाएको थोरै आक्रमणमा पनि भारत निकै कमजोर देखिएको छ । बंगलादेशका लागि दुवै फरवार्डले गोल गरेका छन् ।

सातौं मिनेटमा बंगलादेशले बल पोस्टभित्र छिराएपनि गरेपनि रेफ्रीले त्यसलाई गोलको मान्यता दिइनन् । क्रसबाट आएको बललाई बंगलादेशका फरवार्डले नियन्त्रण गर्ने क्रममा गोलरक्षकमाथि फल गरेपछि रेफ्रीले फलको निर्णय सुनाइन् । नवौं मिनेटमा रतनबाला देवी नोङमाइथेमले पेनाल्टी क्षेत्र बाहिरबाट गरेको प्रहार गोलरक्षक रुपना चक्माले दोस्रो प्रयासमा बचाइन् ।

खेलको ११ औं मिनेटमा बंगलादेशले अग्रता लियो । सोप्नाले गोल गर्दै बंगलादेशलाई अघि बढाएकी थिइन् । उनले कृष्णारानी सरकारको प्रहारलाई दुई डिफेन्सको चुनौती पार गर्दै पेनाल्टी क्षेत्र भित्रबाट फिनिस गरिन् ।

खेलको २३ औं मिनेटमा बंगलादेशले अग्रता दोब्बर पार्यो । कृष्णारानीले पेनाल्टी क्षेत्रभित्र दुई डिफेन्डरको बीचमा बल अघि बढाउँदै गोलरक्षक अदिति चौहानविरुद्ध उत्कृष्ट फिनिस गरिन् । सोप्नाको पासलाई दबाबका बीच नियन्त्रणमा लिँदै कृष्णारानीले सुन्दर गोल गरिन् ।

दोस्रो हाफको सुरुवातमा नै बंगलादेशले अग्रता दोब्बर पार्यो । कप्तान सविना खातुनको उत्कृष्ट पासलाई सोप्नाले पेनाल्टी क्षेत्र भित्रबाट फिनिस गरिन् । सविनाले दुई डिफेन्सको बीचबाट सुन्दर थ्रु पास खेलाएकी थिइन् । ६७ औं मिनेटमा सौम्य गुगुलोथले भारतलाई खेलमा फर्काउने अवसर पाइन् । तर गोलरक्षक बिट भएको अवस्थामा पनि उनले डिफेन्सको दबाब थेग्न नसक्दा बललाई पोस्टको दिशा दिन सकिनन् ।

प्रतियोगिताको सेमिफाइनल खेल भदौ ३१ गते शुक्रबार हुनेछ । दिउँसो १ बजे हुने पहिलो सेमिफाइनलमा बंगलादेश र भुटान खेल्नेछन् । नेपालले साँझ ५:३० बजे हुने दोस्रो सेमिफाइनलमा भारतको सामना गर्नेछ ।