काठमाडौं (हाम्रो खेलकुद)– महिला साफ च्याम्पिनसिप फुटबलमा च्याम्पियन बन्ने लक्ष्यका साथ नेपाली टोली शनिबार भारत भ्रमणमा निस्केको छ । भारतको सिलगुढीमा हुने साफ च्याम्पिनयसिपको चौथो संस्करणमा नेपालले सोमबार भुटानसँग खेल्नेछ ।

अखिल नेपाल फुटबल संघ (एन्फा) का अध्यक्ष नरेन्द्र श्रेष्ठलगायत पदाधिकारीले टोलीको विदाइ गरेका थिए । शुभकामना दिदै एन्फा अध्यक्ष श्रेष्ठले भने ‘तपाईहरुलाई सफलताको शुभकामना छ । हामी तपाईहरुलाई दबाब दिन चाहदैनौं । आफ्नो स्वभाविक खेल खेल्नुस् । टोलीमा केही नयाँ खेलाडी, नयाँ प्रशिक्षक, व्यवस्थापक हुनुहुन्छ । आशा गरौं यसपटक तपाईहरु नयाँ कीर्तिमान रच्न सफल हुनुहुनेछ ।’

यसपटक टोलीमा ७ नयाँ खेलाडी छन् । टोलीको प्रशिक्षकमा कुमार थापा र व्यवस्थापकमा शिवानी थापा छिन् । काठमाडौंबाट भद्रपुर हवाईमार्ग र त्यसपछि टोली स्थलमार्गबाट सिलगुढी पुग्नेछ । समूह चरणमा नेपालले भुटान,माल्दिभ्स र श्रीलंकाको सामना गर्नेछ ।