एजेन्सी – इंग्लिस क्लब म्यानचेस्टर युनाइटेडका प्रशिक्षक एरिक टेन हागले पोर्चुगिज फरवार्ड क्रिस्टियानो रोनाल्डोलाई कारवाही हुने बताएका छन् ।

मंगलबार टोटेनहमविरुद्ध खेलमा वैकल्पिक खेलाडीका रुपमा मैदान छिर्न नमान्दै रोनाल्डोले मैदान छाडेका थिए । खेलको अन्तिम समयतिर युनाइटेड २-० को अग्रतामा रहँदा टेन हागले रोनाल्डोलाई मैदान प्रवेश गराउन चाहेका थिए । तर रोनाल्डोले टेन हागको आग्रह नकारे । त्यसपछि खेलको ८९ औं मिनेट चलिरहँदा रोनाल्डोले मैदान छाड्दै ड्रेसिङ रुमतर्फ लागेका थिए ।

युनाइटेडले बुधबार नै रोनाल्डो चेल्सीविरुद्ध हुने खेलका लागि टोलीमा नरहने बताइसकेको छ । प्रशिक्षक टेन हागले शुक्रबार पत्रकार सम्मेलनमार्फत रोनाल्डोलाई उनको व्यवहारका कारण कारवाही हुने बताएका हुन् ।

‘ रोनाल्डो र मेरोबीच कुराकानी भएको छ । मैले उनलाई प्रष्ट पारेको छु । यो पनि प्रष्ट छ की उनी टोलीको महत्त्वपूर्ण पाटो हुन्,’ टेन हागले भने ।

‘म यहाँको प्रशिक्षक हुँ । यहाँ कस्तो संस्कृति बसाल्ने मेरो जिम्मेवारीमा पर्छ । मैले यहाँको अवस्था नियन्त्रण गर्ने हो । हामी एक टोलीमा छौं ।’

‘रायो भालेकानोविरुद्ध जे भयो, त्यो मान्य थिएन । तर त्यसबेला रोनाल्डो मात्र थिएनन् । यो दोस्रो पटक हो र त्यसको कारवाही हुन्छ । अहिले भएको यहि हो ।’

‘हामीले भोली उनको अभाव महसुस गर्नेछौं । तर टोलीको मानसिकताका लागि पनि यो जरुरि थियो । हाम्रो ध्यान चेल्सीविरुद्ध खेलमा छ र यो महत्त्वपूर्ण पाटो हो ।’

रोनाल्डोले यस सिजन युनाइटेडका लागि सुरुवाती रोजाइमा खासै अवसर पाएका छैनन् । प्रशिक्षक टेन हागसँग राम्रो सम्बन्ध रहन नसक्दा रोनाल्डोले राम्रो प्रदर्शन गर्न नसकेको आँकलन रहेको छ ।