एजेन्सी – बेल्जियन मिडफिल्डर राड्जा नाइनगोलान बेल्जियन लिग अन्तर्गत खेलअघि बेन्चमै भेप (इ-सिगरेट) तानेपछि निलम्बनमा परेका छन् । उनको क्लब रोयल एन्टवर्पले उक्त घटनापछि मिडफिल्डरलाई अनिश्चित समयका लागि निलम्बन गरेको बताएको छ ।

स्टान्डर्ड लिएजविरुद्ध खेलमा नाइनगोलानले बेन्चमा बस्दै भेप तानेको तस्वीर सार्वजनिक भएको थियो । त्यसको दुई दिन अघिमात्र प्रहरीले उनलाई म्याद सकिएको लाइसेन्स लिएर गाडी चलाएको भन्दै नियन्त्रणमा लिएको थियो । लिएजविरुद्ध दोस्रो हाफमा मात्र मैदान प्रवेश गरेका उनले टोलीलाई जित दिलाउन सकेनन् ।

एन्टवर्पले अनुशासन तोडेको पछिल्लो घटनापछि उनलाई निलम्बन गरिएको बताएको छ । क्लबले हाललाई यस घटनाबारे थप केहि नबोल्ने र अन्य खेलको तयारीमा जुट्ने उल्लेख गरेको छ । खेलाडी नाइनगोलानले पनि क्लबको निर्णय स्वीकार गरेको बताएका छन् ।

‘क्लबले लिएर्को निर्णय मैले स्वीकार गरेको छु । तर मलाई लाग्छ यो कारवाही अलि बढी भयो । म अब क्लबलाई अन्य ठाउँबाट सक्दो सहयोग गर्नेछु,’ नाइनगोलानले इन्स्टाग्राममा लेखेका छन् ।

यसअघि पनि धुम्रपानसँग उनको नाम पटक पटक जोडिएको थियो । इटालियन क्लब एएस रोमामा रहँदा उनले सहायक प्रशिक्षकसँग गएर धुम्रपान गर्थे । सन् २०१६ मा बेल्जियमको राष्ट्रिय टोलीमा रहँदा उनलाई धुम्रपान गर्नकै लागि बाल्कोनी भएको कोठा दिइने गरेको प्रशिक्षक मार्क विल्मन्ट्सले बताएका थिए ।