एजेन्सी – सात गोलको थ्रिलमा इन्टर मिलानले रोमाञ्चक जित निकालेको छ । इन्टरले घरेलु टोली फियोरेन्टिनामाथि ४–३ को रोमाञ्चक जित निकालेको हो ।

इन्टरको जितमा लोउटारो मार्टिनेजले दुई तथा निकोला बरेल्ला र हेनरिक मिखटारयनले समान एक गोल गरे । फियोरेन्टिनाका आर्थर कावरल, जोनाथन कोन र लुका जोभिकले गोल गरे ।

शनिबार राति भएको खेलको दोस्रो मिनेटमा निकोला बरेल्लाको गोलबाट इन्टरले अग्रता लिएको थियो । उनले मार्टिनेजको पासमा गोल गरेका थिए । १५औं मिनेटमा मार्टिनेजले गोल गर्दै इन्टरको अग्रता दोब्बर पारे ।

३३औं मिनेटमा आर्थरले गोल गर्दै खेललाई २–१ को स्थितिमा ल्याए । ६०औं मिनेटमा जोनाथनले गोल गर्दै खेललाई २–२ गोलको बराबरीमा ल्याए ।

७३औं मिनेटमा मार्टिनेजले पेनाल्टीमा गोल गर्दै इन्टरलाई पुनः ३–२ को अग्रता दिलाए । ९०औं मिनेटमा लुका जोभिकले गोल गर्दै फियोरेन्टिनालाई पुनः खेलमा फर्काउँदा खेल ३–३ गोलको बराबरीको स्थितिमा पुग्यो ।

त्यसपछि इन्ज्युरी समयको थप गरिएको पाँचौं मिनेटमा हेनरिक मिखटारयानले गोल गर्दै इन्टरलाई ४–३ को रोमाञ्चक जित दिलाए । यस जितसँगै इन्टर ११ अ‍ेदबाट २१ अंक जोडेर सातौं स्थानमा रहेको छ । पराजित फियोरेन्टिना १० अंक जोडेर १३औं स्थानमा रहेको छ ।

अर्काे खेलमा एसी मिलानले मोन्जामाथि ४–१ को सानदार जित निकालेको छ । मिलानको जितमा ब्राहिम डियाजले दुई तथा डिभोक ओरिगी र राफयल लियोले समान एक गोल गरे । मोन्जाका फिलिपो रानोचियाले एक गोल फर्काए ।

यस जितसँगै मिलान ११ खेलबाट २६ अंक जोडेर दोस्रो स्थानमा उक्लिएको छ । समान २६ अंक नै रहेपनि एक खेल कम खेलेको नेपोली शीर्षस्थानमा छ । पराजित मोन्जा १० अंक जोडेर १४औं स्थानमा छ ।