काठमाडौं (हाम्रो खेलकुद)– पाकिस्तानविरुद्ध कात्तिक अन्तिममा हुने मैत्रीपूर्ण खेलको लागि राष्ट्रिय फुटबल टोलीको प्रशिक्षणमा ३० खेलाडी बोलाइएका छन् ।

पाकिस्तानसँगको मैत्रीपूर्ण खेल तय भएकै दिन मंगलबार अखिल नेपाल फुटबल संघ (एन्फा) ले मुख्य प्रशिक्षक नियुक्तीसँग ३० खेलाडीलाई प्रशिक्षणमा डाकेको छ । एन्फाले सहिद स्मारक ए डिभिजन लिग च्याम्पियन टोली मछिन्द्र क्लबका प्रशिक्षक प्रवेश कटुवाललाई मुख्य प्रशिक्षक नियुक्त गरेको छ ।

नेपाल र पाकिस्तानको राष्ट्रिय टोलीबीच कात्तिक ३० गते मैत्रीपूर्ण खेल हुने तय भएको एन्फाले मंगलबार जनाएको छ । पाकिस्तानको पुरुष फुटबल टोली आठ वर्षपछि अन्तर्राष्ट्रिय फुटबलमा फर्कन लागेको हो । यसअघि महिला टोलीले भने काठमाडौंमा आयोजना भएको महिला साफ च्याम्पियनसिपमा भाग लिइरहेको छ ।

फिफाको प्रतिबन्ध हटेपछि पाकिस्तान फुटबलमा फर्केको हो । पाकिस्तान फुटबल संघ (पिएफएफ) ले दुई मैत्रीपूर्ण खेलका लागि एन्फालाई प्रस्ताव गरेपनि एन्फाले मंसिर ४ को निर्वाचनका कारण एक खेल मात्र खेल्न सम्भव भएको जवाफ पठाएको थियो । एक मात्र खेलका लागि पाकिस्तान तयार भएपछि नेपालसँगको मैत्रीपूर्ण खेल तय भएको हो ।

असोज ११ गते बंगलादेशविरुद्ध मैत्रीपूर्ण खेल खेलेको नेपाली टोलीले त्यसयता अभ्यास गरेको छैन । बंगलादेशविरुद्धको मैत्रीपूर्ण खेलका लागि एन्फाले प्रदीप हुमागाईलाई कार्यवहाक मुख्य प्रशिक्षक नियुक्त गरेको थियो । हुमागाईको अन्तिम रोजाईमा पर्न नसकेका नवयुग श्रेष्ठ, पुजन उपरकोटीलगायतका खेलाडी प्रशिक्षणमा बोलाइएका छन् ।